- Advertisement -

去完表參道、南青山,因為大家當日都行得好累,所以冇黎神氣咁!決定搭地鐵去六本木啦!
一到埗,佢地既行動速度更每下愈況tim~~好似就死咁!
淨係得我一個冇事~~haha,可能我真係行得比較快,同去得旅行多,係咁不斷行都冇事,而且我都唔覺得累,咁我見佢地咁累,就叫佢地坐佢六本木既information center門外~~
因為我知道六本木有好多裝置藝術雕塑,我想搵佢地出來逐一影相,但好可惜,天公不造美,又落起微雨呀!

咁我get完資料,見佢地冇意識想行,咁我就叫佢地坐,我自己上去影下相先!
呢個就係地下鐵出口的六本木Information Centre啦~~佢地就係坐係呢度!

跟住我就搭呢條電梯正式上去呢個未來都市新型態—六本木Hill~

一上到去就係咁樣ge!一個圓筒型建築,有個大電視,亦有一排玻璃瀑布,好靚呀!
而且亦都好綠化呀~~好舒服既感覺!

呢隻就係大蜘蛛,算係其中一件裝置藝術啦!係地標,點可以唔take photo呢!

之後又影左呢幅六本木既主建築物~~觀光層就係上面,一諗到可以望到全東京市的夜景就好興奮啦!

其實仲影左好多相,不過唔放咁多上黎啦!影左一陣就落返去搵佢地囉!
不過我感覺到佢地已經係唔願行囉!攪到好似係5個專登陪我黎咁樣!
之後入左去果棟主Buliding搵展覽廳同觀光廳既入口~~就係入左下圖啦~~佢裡面既設計好獨特,有d同澳門而家間星際有得揮,呢度突一舊,果度又突一舊咁!不過六本木係用左大量自然採光,環保又節能的設計,加上綠化度好高,果然係新生都市型態的試驗區呀!

之後就係正式既六本木hill Information度問資料~~佢既門面設計多靚ga~~水藍配白漸層,特色設計的英文字型!

跟住我地終於搵到上觀光層的門口,個門口都幾得ga!又有條好似時光隧道咁既設計~~
可惜我手震,影到震哂,delete左啦~~
呢個係上觀光層既專用電梯!著哂燈好有未來feel呀~~

一上到去,我地第一件事梗係去睇重點項目一:Pixar 20 Years動畫展~~
真係勁正,arm arm去日本就meet到個展期~~可以見到好多卡通人物既手稿、模型、紙稿……

呢個係佢門口,白哂果個位就係上面果條banner啦~~
見唔見有海底奇兵既小丑魚呀!我地個個都襯冇職員既時候,攪住條魚影相~~
又係偷偷地ga~~(去到日本成日都要偷影相,因為實在太多地方唔畀影相啦!)

入到去就有一段15分鐘既短片,不斷循環播放,係將所有Pixar既動畫來一個remix版,而且全部內容獨家係呢度播,第度睇唔到ga~~又有超人特攻隊、怪獸公司、海底奇兵、反斗奇兵、反斗車王……多到數唔哂呀!

之後又有好多好多手稿,仲有一個係好特別ga!我真係畢生難忘,就係有一個好似旋轉木馬咁既裝置,初時你睇冇乜野,佢有指示叫你等,我等左10秒左右,佢裡面d野突然間轉得勁快,變成左一段動畫,非常犀利,不過我知道其實係一個視覺錯覺來的!

之後我好快咁睇完,因為都唔畀影相,如果唔係我真係會睇好耐囉!係出口處有一個獨賣場,有今次展覽既相關精品賣!下圖係cashier,見唔見有好多T-shirt,我就冇買,因為太貴啦~~
咁我賣左d乜?就係下圖最左邊既Folder (式樣同T-shirt),仲有就係收銀機之間果本書(佢有哂展覽裡面d野),所以幾貴就值啦~~
我而家有時開會用呢個Folder,個個都問係邊度賣,我話而家冇得賣ga啦~~限量版!
我問過店員,最好賣就係Pixar ( i 字係用盞燈),如果有睇開Pixar既動畫就知,每套片都有既片頭標誌,而且從來冇出過任何週邊商品,所以個個都買,當然我都有買啦!hehe~~

仲有好多公仔、精品食品、文具等!

係賣場入面,仲有一隻近乎米七既巴斯光年,以及豆釘咁細隻既三隻仔,比人任影唔嬲。

睇完Pixar動畫展之後,就睇埋一個非洲藝術展,同樣又係唔比影相!

睇完之後再去觀光迴廊度影相,又係咁arm,觀光迴廊有d玻璃珠燈飾展覽,我揀左幾張post出來畀大家睇!

呢個d顏色好靚ga!

一隻用玻璃珠+燈泡製作而成的被綑綁的鱷魚呀~~好funny~~

呢個都係好特別,顏色又好吸引tim~~

之後就係度影夜景,雖然d玻璃好清,不過可能d燈太光,一影就反光,你看看下圖,見到我部相機呀!
唔係靈異相黎ga!

呢張就好少少囉!不過都見到d燈~~(中上綠色光)唔好以為係ufo呀!

去完觀光迴廊影完相,靚完夜景,我地出返去51樓既大堂!
果度有間Museum Cafe,佢個入口係一個白色布條製作而成ga~~
仲打左d畫面,乍看之下以為係一幅畫,原來係出入口,認真夠特色啦~~

落返地下之後,去左六本木吉祥物果店,好得意既公仔,但係勁貴,所以完全冇賣野意慾!
下面呢張,又係用相機偷影ga~~(佢大大個牌寫明唔比影相!)

其實我每次係d店裡面偷影,我都扮哂傾緊3G咁去影囉!等人地唔為意~~大家唔好學呀!
從六本木出來就返回池袋食晚飯,今晚食迴轉壽司,我唔記得影相呀!

下一篇就開始第6日既行程,亦算係最後一個景點,就係東京迪士尼海洋!
又係好lucky,我揀果日去,就arm arm係佢五週年慶典既首日,又有禮物收,又有勁多show睇!
大家下一篇有得睇啦!

(
待續:東京迪士尼海洋part 1)
詳盡相片資料及其他沒貼文的相片於 [相簿>06′真夏東京] 內。
/攝:阿乃


著作 係採用 創用 CC 姓名標示-非商業性-禁止改作 3.0 授權條款授權.

 

環球旅人&旅居 總編輯|一名旅遊編輯、旅遊達人,也是朋友的旅遊顧問及澳門旅遊導賞。曾任藝術中心主任、網絡電台及電視台總監、雜誌編輯、平面設計、博物館策展及導賞...... 2005年開始寫作,於2012年投身製作網路電台及視頻的旅遊節目,並創立了澳門首個-網上旅遊媒體「環球旅人」,更於2020年出版「旅報」電子月報、「旅居」電子旅遊雜誌。(聯繫、合作或邀約:[email protected]

發表迴響