第三天,終於來到洛磯山脈中最有名的 哥倫比亞大冰原。

一早出發便趕往哥倫比亞大冰原,一到埗就立即在遊客登山中心度影下相先啦,因為登山的大型巴士有時間規定,距離下一班車仲有一定時間,便可以影下相,買下紀念品先啦~~

由於冰原都係受溫室效應影響而日漸縮細,而且冰面不穩,所以每個月都會改變登山的路線,以及停留的位置,以免發生意外。而冰面的負重亦有規定,所以每小時只有6架專行巴士一同上山,因此我有幸踏上冰原之上,真的是好運,起碼我可以完好無缺地返落黎!

以下是在遊客登山中心影的冰原風景及解說牌(下四圖)

之後乘登山專車往冰原深處進發,上到山上,原來仲要轉一次車,要轉成下圖的大雪車。
這架大雪車又係一件令我好驚既事,因為我自小就好驚離心力,所以搭飛機起飛時我都會驚,遇氣流又驚,當然就更加唔敢玩過山車、跳樓機啦~~但至於鬼呢,我就一d都唔驚,將來有機會就同大家分享下!

講返正題,因為坐呢架車入冰原有一個步驟,就係坐呢架冇安全帶的雪車從上面衝落一條剛夠兩部雪車透過,有成80度(幾乎直哂)既斜路,導遊話從來未試過發生意外,唔駛驚,我話佢都傻ga,架車上有邊個唔驚呀~~

佢一衝落去之前仲數3,2,1,擺明嚇人,所有人都尖叫,一衝落去真係好快,但只有1秒到就立即以龜速落去,跟住導遊就話:”你估真係衝落去咩,你唔要命我仲要呀!”

原來這是司機同各導遊夾好哂,用左好多年既嚇人伎倆,目的是增加刺激感,令旅程冇咁單調呀!

之後又係冰原上講明規定,只可行走那些範圍,不可行走那些範圍等。跟住就各自影相啦~~而好多團友就去條溶雪水流(下圖)度裝水飲,導遊之前叫大家帶水壺ga!

其實在冰原上我唔覺得凍,可能本人體質問題,人人著羽絨,又羊毛衫,有些跨張到著成六、七件衫,而我,你看看前張圖,我只著了一件抓毛外套、一件普通間條展衫、一條好薄既夏季長褲就已經夠。

有好多人話我傻ga,著咁少衫。但我真的唔覺凍,當然之後都冇病到啦!

以下幾張是我在冰原上拍攝的,好有壓迫感的冰川,如果佢一冰崩就一定死硬,因為冇路走同走唔切啦!


睇完冰原就重覆之前的路線下山,準備前往洛磯山中美麗的國度—–班芙市。

(下一篇:班芙市)
編/攝:阿乃

環球旅人&旅居 總編輯|一名旅遊編輯、旅遊達人,也是朋友的旅遊顧問及澳門旅遊導賞。曾任藝術中心主任、網絡電台及電視台總監、雜誌編輯、平面設計、博物館策展及導賞...... 2005年開始寫作,於2012年投身製作網路電台及視頻的旅遊節目,並創立了澳門首個-網上旅遊媒體「環球旅人」,更於2020年出版「旅報」電子月報、「旅居」電子旅遊雜誌。(聯繫、合作或邀約:[email protected]

發表迴響