fbpx
26 C
Macao
星期五, 5 月 7, 2021

032 澳門人講飲講食:Cafe de E.U.

0
032 澳門人講飲講食:Cafe de E.U. hello~~各位好!澳門人講飲講食都好耐冇同大家見面啦!原因係早前忙著工作,忙著韓國的遊記,以及忙著台灣旅遊的短片製作呀! 現在終於有d點時間post返d 澳門食肆出來啦!今次為大家介紹既係一間我幾鍾意既cafe shop!   我地台灣之旅既旅後分享都係呢間cafe度進行ga! 它位於澳門半島雅廉訪區雅廉訪大馬路前段(石獅子正對面),名叫"Cafe de E.U."主要是日式及歐式甜品、餐飲為主,以歐洲古典式佈局,感覺非常好,又有大大張紅色絨質sofa坐!它分地下及1樓兩層,樓下非吸煙區,樓上吸煙區!而樓上亦設有圖書角,包含各類書籍供客人免費閱讀! 而我呢去過都差唔多10次左右,我好鍾意佢個環境呀~~又舒服又寧靜!大家先來看看! 大大水晶燈一盞! 由於地下常常冇位(因為只有3張檯,其中一張係大sofa,可坐8人ga!),so只可揀2樓,不過儘量遠離d煙民囉!圖中所見就是圖書角啦~~有好多書ga!我地最鍾意係下午茶時間來這裡,三五知己來hea下,有時傾下大家近況,有時幫朋友占卜,有時來開會,因為我地貪佢好feel又寧,唔會畀人滋擾!仲可以睇下書tim~~不錯! 這是1樓的我們常坐的位置! 這是上1樓的樓梯!是否好歐洲韻味呢~~ 講左咁耐環境!都係時候講下食物及價錢方面啦!其實呢間鋪係食裝修同個feel ga!so價格會略貴,但平過starbucks少少!那大家心中應該有個價!(可能大家係星期六、日會見到我同d friends係度都唔出奇ga!) 檸檬梳打 mop$35 沖繩橘子梳打 mop$35 各式三文治/多士 mop$38-45 它也會有套餐提供! (價格update @ 2007.5.13)因為需要mop$50,就有6款飯/意粉,如再加一杯凍飲需加$15,或加一壺花茶需要$10!所以我地而家好多時都係叫set囉! 總體指數參考:室內環境 服務態度 食物質素 食物種類 交通便利 價格          佢既營業時間係星期一至四、日中午才開門,晚上8點close。而星期五、六就早少少開門,晚上10:30才close。如唔係好清楚,到時你可以去到問老闆or老闆娘!它們前面仲有一間時裝店ga!都係佢地經營的,不過只是女裝! 文:阿乃攝:阿乃

澳門人的推介:特色面食、早餐宵夜、下午茶篇

0
上一篇得到大家熱烈的回應,希望真的幫到大家啦!下次來澳門記住試下去d我介紹,但你又未去過的地方呀!地點唔知可以回應問我,我會答你,因為篇內字數限制,唔可以打哂所以地址出來,只有你地有興趣知道就問地址!我及其他澳門blog友都答到你地ga!' 另外就係記住看看回覆的留言,可能已經有你想問的答案在啦! 今篇就係講粥、粉、面、咖啡簡餐為主,適合各位於早餐、下午茶及宵夜時間肚餓去醫肚既地方!亦同上一篇一樣,其實澳門有好多有特色既食店,但也不能盡錄,不竟我都未食哂全澳門丫嘛! 推介表列:河漢記、雅馨(雅香)、寶記 - 緬甸面食(如魚湯粉、雞絲撈面、椰汁雞面……)東京小食館 - 緬甸面食(如豬腦面、雞絲撈生面……)園林 - 豬扒粉絲湄南河 - 越南什扒飯華記 - 牛腩河粉、雲吞面、魚蛋河粉黃枝記(老鋪) - 雲吞面一哥、銀禧 - 粥品、腸粉、面食樁記 - 粥品、腸粉、鮑汁糯米雞盛記(勁平既早餐之選) - 粥品、糕品、特色豆腐花 西灣安記 - 炸豬扒包、煎豬扒包、豬扒干撈意葉熾記、大利 - 炭燒豬扒包瑪嘉烈、安德魯 - 葡撻、中東包、檸檬水生利 - 炸魚片、煎魚片、牛腩面、豬扒包朱古力咖啡、*上品咖啡、檀香山咖啡、澳門咖啡、Cafe de Eu - 特色咖啡館金隆 - 招牌過橋米線、魷魚鬚、玫瑰水 *:表示我已經係 "澳門人講澳門" 介紹過,大家可以去分類 "澳門人講澳門" 內找尋一下 編/攝:阿乃

澳門人的推介:搵食篇(找食篇) [email protected]/8/30

0
承上兩篇之後,點可以唔介紹餐廳比大家呢!今次就介紹晚餐既餐廳比大家,希望大家可以除了食小食之外,仲有可以坐得舒舒服服,以及品嘗各國美食!絕對不比香港差的,當然梗係比香港平tim啦!    如果各位澳門朋友都有推介的話,我都會將其資料放入這幾篇內,而且會不斷更新!希望各位來澳門玩得放,食得爽啦!   推介表列:(Update 2009/08/30)#葡萄園(皇朝)、#Antonio、#諾曼第(氹仔舊城區入口) - 葡國菜#美心亨利(西灣)、#咖喱屋(西灣)、#富仕葡國餐(雀仔園) - 澳葡菜#路素餐廳(氹仔官也街內巷) - 葡式住家菜#荷里活餐廳(高士德)、#勝利茶餐廳(新馬路大豐) - 扒房#比薩薄餅店(噴水池/萬里長城)、#經典意大利(皇朝)、Otto(皇朝) - 意大利菜拉丁區(皇朝)、新葡京酒店內法國餐館 - 法國菜Tacos(皇朝) - 墨西哥菜#上海(長城/喬江/皇朝)菜館 - 上海菜首爾韓國餐館(皇朝金龍)、宮(皇朝大豐)、#漢城(氹仔舊城區入口) - 韓國菜余榮記(高士德/氹仔)、長城燒烤(萬里長城/皇朝) - 澳葡菜及燒烤餐茶餐廳星越館(皇朝) - 星馬菜忙裡偷閒(高士德)、饕(雀仔園) - 特色小火鍋、特色小食及飲品台北小泉居(各區)、藍山咖啡(皇朝)、Ms.Honey - 台式餐飲和花亭(新馬路/漁人碼頭)、千色手打拉面店(連勝馬路)、幕府、水花田(氹仔)、鮪味亭、瀛 - 日本菜#札幌(黑沙環) - 日式火鍋#內港灣、#一樓美食、#東昇、#德興 - 火鍋新濠仔、師傅仔、康記、百里鮮、泰豐、金陶園、華軒/細龜 - 小炒暹羅小館、西貢越南美食、寶記、東京小食館、雅馨雅香、湄公河 - 越南緬甸菜牛記、黃枝記老店、連記、新榮記、鳳城珠記、西灣安記、皇冠小館 - 中式面食、茶餐廳泰皇泰國、志記、廚屋餐廳、朗朗泰式餐館 - 泰國菜園林米線、金隆雲南米線、美味佳...

031 澳門人講飲講食:荷里活餐廳 (西餐廳/扒類)

0
031 澳門人講飲講食:荷里活餐廳  (西餐廳/扒類)   除夕夜當晚我地去漁人碼頭做愚人之前,梗係要食晚飯先啦!而當時我地下午去了打保齡先,而L小姐的男友就6點9到了荷里活餐廳等位啦!(在此要特別多謝L小姐的男友,早d去等位,足足等左45分鐘呀!)拿了9號籌!我地去到時已經係7點半,但仍然未有位,等到8點先有位坐呀! 今次我介紹既呢間荷里活,係澳門好耐歷史ga啦!主打係牛扒、牛柳!價錢公道唔貴,但服務就唔係太好!(但我今次去,d服務態度都唔係好差o者!)(ps.因為我去過一d服務態度勁差既店!) 好啦~~唔講咁多!首先我有一行7人,有人叫了非洲雞!但我冇試食,唔知d味好唔好,但我見佢食哂,應該都ok掛! 而有2位就叫了紐西蘭西冷牛扒 (Mop$58)聞到個味都幾唔錯呀!而且都幾大塊,但厚度就係招牌公司牛柳的一半呀!好味指數: 而我&另外兩位,共3人就叫了佢既招牌 公司牛柳 (Mop$68),有薯條同蘿蔔伴碟,塊牛柳係好厚ga!而且又好林好多肉汁,味道亦都非常好!真係好招牌囉!抵死夾大件呀!好味指數: 另外一個菜色,我地有5個人叫既就係 酥皮魚翅鮑魚湯 (Mop$38)簡直係犀利呀!又翅又鮑魚,唔講唔知,真係有翅ga!不過鮑魚就唔多覺眼囉!真係好好味呀!個酥皮又好正,絕對係抵~~好味指數: 位於高士德雅廉訪區域的。係羅神父街 (雅廉訪馬路幸運閣斜對的直街),或是悅書房、菓風小鋪的對面。地址:羅神父街25號B營業時間:12:00pm -- 1:00am訂座電話:28565586 編:阿乃攝:N小姐、C先生

澳門人的推介:手信與小食篇

0
其實有好多香港及外地來澳門的朋友,他們的印象中就只有鉅記、大利豬扒包、大三巴等主要野!但其他澳門仲有好多好既美食品牌,以及每間店都有自己最出名的招牌,所以各位唔好再停留係 "鉅記黨"、"大利排長龍" 的階段啦! 我希望我貼呢幾篇澳門人的推介,可以讓各位有睇我blog的朋友,以後到澳門可以發掘更多好食孚玩的東西!亦希望大家會鍾意呢個新系列啦! 下面個表都唔似好完全,一定會漏左d ga啦!有d係老字號鋪頭,好多澳門人自己都會常去ga!ps.我冇幫任何店賣廣告,只係希望大家真係食到買到每店的招牌,而唔好盲目跟隨而已!到時大家可以印出來,來澳門時逐間對住就唔會錯! 手信(正宗)小食:鉅記 - 炭燒杏仁餅、有餡鳳凰卷、紫菜xx捲大三巴 - 杏仁餅咀香園 - 蛋卷、鳳凰卷、杏仁餅香記 - 肉乾檸檬王 - 檸檬薑、檸檬王百花魁 - 涼果樂宮餅店(葡京) - 曲奇餅御品堂 - 炭燒棋子餅車厘哥夫、老牌車厘哥夫 - 紐結糖晃記(氹仔) - 老婆餅、肉切穌三可餅家 - 雞蛋餅遠來餅家 - 光穌餅、中式禮餅(如皮蛋穌……)仁慈堂門口車仔 - 金錢餅沙度娜、九如坊 - 米糠布甸義順 - 雙皮奶、薑汁撞奶、木瓜牛奶杏香園 - 中西式甜品陳林記、恆友 - 魚蛋小食小上海...

030 澳門人講飲講食:古漪園 南翔小籠包 (上海菜)

0
030 澳門人講飲講食:古漪園 南翔小籠包  (上海菜) 今次介紹呢間食肆係上海既過江龍『古漪園』,位於澳門皇朝區巴黎街 (大豐銀行- 澳門航空總部果條街,舊Another鋪位)價格大約每位:mop$40-80   我地先講講環境,呢度既佈置都幾唔錯,而且好有中式古典feel,用既檯椅、窗花、門都係好中式,用上胡桃櫸木製造!而燈具就用上簡單時尚的設計,外露的天花頂,感覺有crossover之感! 食物方面,呢間最出名就係南翔小籠包,而南翔小籠包又分有蟹粉、豬肉等不同餡料! 而我地就叫左 蟹粉南翔小籠包、雞絲粉皮、穌炸小籠包、三鮮肉絲豆腐湯、上海菜飯、火腿津白!先講講雞絲粉皮,呢個係冷盤,落得太多麻油同九層塔,所以麻麻地。 (5為最高)蟹粉小籠包,最有水準,亦都係最好味! (5為最高)穌炸小籠包,就好似油浸咁,好肥! (5為最高) 再來就是火腿津白,將d火腿碎到一粒粒鉛筆碎咁!賣相唔錯,但好睇唔好食呢!半盤都係油浸菜,都幾恐佈ga!  (5為最高)呢個就係三鮮豆腐湯,雖然細細盤,但都好唔錯,d豆腐變成絲狀,好滑好味,只不過又有d九層塔係度!扣少少分先!(因為冇乜人鍾意食九層塔)  (5為最高) 呢個就係上海菜飯,個味就幾唔錯,但可惜,又係勁多油! (5為最高) 佢而家仲係試業中,而且d款式太少,連一d經典菜式 "上海粗炒"、"上海炒年糕"、"生煎包"、"煎餃"......都冇囉!而且d菜就細細碟,價值都唔平!所以如果你淨係食小籠包就好唔錯,另外再配個湯已經好好!如果唔係一定好失望!我下次食上海菜,都係去返 "上海xx菜館"、"飲食男x"好過,又比較平,而且又好食! 綜合評價:60分 (100為最高) 編/攝:阿乃

029 澳門人講飲講食:椿記粥品 (宵夜粥品)

0
029  澳門人講飲講食:椿記粥品 呢間野我好鍾意去食宵夜既!位於美副將大馬路(觀音堂果條街,觀音古廟對面),與姑娘街的夾角位!叫椿記~~招牌係藍色ga~~   佢都算係好味,我好多時都鍾意幫襯,夜晚通常都有位泊!價錢又適中~~我最鐘意食既就係 叉燒腸、艇仔粥+炸魚片!亦有時叫牛肉粥、炸面腸、炒面、豆漿咁啦! 另外佢有d好味推介,好多人叫ga~~算係招牌菜色!包括:xx蠔仔粥、水蟹粥、鮑魚汁糯米雞、海味羅蔔糕!而我覺得佢d叉燒腸、牛肉腸係好新鮮囉!絕對唔係翻叮! 住澳門的各位,未去過,下次可以試下!(上圖有價目表)放心,佢d粥好大碗ga~~ 黎玩既朋友,夜晚又多一個地方可以去食野呀!絕對係好推介! 美味指數: 編/攝:阿乃

028 澳門人講飲講食:內港灣火鍋

0
028 澳門人講飲講食:內港灣火鍋 呢間野開左都有2,3年,我亦去過無數次,但我發現原來一次都冇介紹比各位啦!其實佢係位於河邊新街 舊媽閣總站對面(亞洲汽水廠斜對面),名叫 "內港灣火鍋"!(橙+綠色招牌)~~   營業時間:6:00pm ~ 4:00am 佢出名既就係湯底多,價錢公道,食物種類多!我今日係同一班舊同事出來聚會食個晚飯,順便傾一傾d旅遊野! 我地今日好厲害呀!4個人食左好多野!我地揀左兩拼湯底,沙嗲湯底 + 椰子雞湯 (Mop$22), 而所點食物如下(以一碟計):肥牛片 x3美國肥牛 x2雪花肥牛 x1響螺片 x1墨魚滑 x1生菜 x1日式豆腐 x1鮮蝦雲吞 x1魚片餃 x1蘿蔔片 x1炸竹笙 x1蟹子包心丸 x1芋絲 x1豬肉丸 x1三文魚刺身 x1鮮榨蔗汁 x2枝可樂 x1枝 總數:Mop $470 (有九折,因為我耐唔耐幫襯ga!) 4個人100左右,抵呀!分數:8.5分備註:每次去之前需要訂位,否則好難有位ga! 下次大家可以去食呀!絕對係好介紹,d肥牛、肥羊比小肥羊更好,又唔駛排隊等位,又唔係好熱,通風都ok~~ (用手機影所以質素唔好,又手震!)編/攝:阿乃

027 澳門人講飲講食:Checkers格子咖啡[已歇業]

0
027 澳門人講飲講食:Checkers格子咖啡 (潮格咖啡廳) 今次為大家介紹係一間位於皇朝區的型格咖啡廳,看見店門好有特色呀!好多時經過都以為係好貴ga!   你看看店內的餐紙,有經過精心設計ga~~仲有個好kawaii既咖啡杯公仔~~ 看看店內的陳設,都好有特色ga,有分為梳化軟座,以及普通硬坐兩類!而檯數不多,檯與檯之間都有足夠的空間,柔和的燈光,又有水族箱~~ 一入到來,我最喜愛的就係呢幅牆,好有層次感,下放了一個個蠟燭,應該係夜晚會點著佢ga! 看看店內的吧台及其他位置,洋溢著濃厚的藝術氣息,不論是燈光、配色、格調,以至牆壁、藝術作品及珠簾的擺放,都顯出一番心思呀!店內的陳設裝潢:9分 究竟格子咖啡係邊?點樣去?看看下圖吧!連營業時間都有呀! 大家又來看看Set lunch,都唔係好貴咋!係皇朝區算係平ga啦! 又貼那一幅牆的相片~~haha 下圖呢個係一個下午菜set來的,26元,有多款選擇,而我地其中一個friends就揀左西多士配冰綠茶呀!賣相都幾唔錯ge!味道佢話同出面既差不多,不過就林d,冇咁脆囉! 呢杯就係我叫既  Iced Mochachiro(冰摩卡其諾咖啡),價值mop$26,咖啡味濃,而且忌廉恰到好處,帶出甜味,亦略有少咖啡苦味囉!綜合來說都有:8分 再來看看我地叫左d乜?看看下圖,我地叫左 "焗蜜麥厚多士" 、 "巨型雞扒三文治",都唔係好貴,而且唔係度度有得食,所以就叫左啦! 登~~登~~登~~登~~呢個就係 "焗蜜麥厚多士" ,好重楓蜜蜜糖味,又好鬆軟既面包,只不過個包皮有d燒焦左,總括來說都唔錯,只不過d楓糖未能滲入底部,導致上面太甜(因為我唔鍾意食太甜),下面冇乜味囉!另外,其實個包皮係好味個包心,因為包皮脆脆地,又甜甜地,且唔會太甜,arm arm好!所以 "焗蜜麥厚多士" 既分數係:8.1分 (因為個包皮令人驚喜,所以比多0.2分佢) 之後就到呢個 "巨型雞扒三文治" 啦!我好欣賞呢個,因為除了雞扒,仲加有腿蛋,變成2層,好似公司三文治咁!另外,佢d雞扒係用香葉醃ga,所以同出面d雞扒好唔同,非常美味~~所以總分分數有:8.2分 之後大家都飲飽食醉,執一執檯,阿乃大師又要開壇為各位善信占卜啦!呢間既格調好好,非常適合占卜!我係玩石頭占卜,大家都話準,如果唔係d善信就唔會越來越多,而且有好多占卜,冇幾耐又要找我再占其他問題啦~~haha (UPDATE AT 2007-09-25:現在他們推出了多款套餐,每款都是29元澳門幣,有湯、沙拉、主菜、麵包、飲品呀!非常捧的哦!) 編/攝:阿乃

026 澳門人講飲講食:小上海鍋貼

0
026 澳門人講飲講食:小上海鍋貼 這家店對每個澳門人來說並不陌生,亦可以說幾乎每個澳門人都幫襯過ga啦!位於賣草地外賣小泉居隔離既巷仔內,以傳統方法製作的鍋貼、生煎包!   其實唔係間間上海菜有生煎包賣ga!而且這間店,每次都有大批人係度等新鮮既生煎包、鍋貼、煎餃子出爐,佢仲要係o係你面前煎,保證係最新鮮~~ 以前自由行未開放既時候,澳門都唔算繁榮既年代,我地已經要排長龍買佢既上海食品,而家可能係更誇張tim呀! 講返先,佢每個賣的價錢由 1蚊至2蚊澳門幣不等,超級平平平~~好多時d人都一買就十幾,廿幾隻咁買ga!所以有時你排到好前,都未必有你份,可能都要等下一輪出爐呀! 佢最出名既都係得三樣野,包括:鍋貼、煎餃子、生煎包 好味程度達:8.8分ga~~ 希望下次再次來澳門,又多一個小食店,可以買野食啦!雖然我都知,好多雜誌、書藉都介紹過,但在此我都要再介紹好一次,因為我成日都食ga~~真係好唔錯,又平既上海小食呀! 編/攝:阿乃

025 澳門人講飲講食:禮記鮮果(果汁撈)

0
025 澳門人講飲講食:禮記鮮果(果汁撈) 我今次講既唔係荷蘭園既 禮記雪糕,係另外一間完全不相關的店,叫 "禮記鮮果",呢間店以前係o係現在賣草地的Bossini位置,因為當時要拆,以及重新裝修而被迫結業了! 當時係2005年左右,自由行都已經開放,禮記鮮果的生意滔滔,人流不斷,但好可惜被迫結業!但昨天經過賣草地,發現它終於找到鋪位,並重新出發,再度開張,而且店舖被以前更加清潔,更加燈火通明,仲有就係跟以前的位置只有數步之隔!   講左咁耐,大家都可以唔知係邊,其實就係各位由議事亭上大三巴的必經之路!入草堆街就要係議事亭既bodyshop往左上三大巴這一路後,此路後有台北小泉居外賣部、Roxy新開的專門店、裕興隆廣場、新Bossini、CK underwear專門店、大聲公涼茶、女媧廟等! 而 "新既禮記鮮果" 鋪位就係昔日紅豆餅果個位度!看看下圖~~ 以後經過,大家就可以繼續賣生果撈來食啦!係最出名既有三款生果撈,分別是:1. 芒果汁生果撈  (9分)2. 蜜瓜汁生果撈  (8.8分)3. 西瓜汁生果撈  (7分)分數純粹個人喜好! 它的特別就是生果勁多,果汁比其他店舖較少,咁先抵食,一杯已經好飽,每杯都係十幾廿蚊之嘛!(我唔知而家重開有冇貴到呀!但一定就係因應唔同的果汁底,會有唔同的價錢!) 另外,如果你唔想食杯中某類生果,仲可以一早同佢講,佢會幫你換其他生果!例如我唔食木瓜同火龍果,佢就會幫我換成蘋果 & 楊桃,非常好人呀!價錢不變~~hehe 以後大家係附近就可以買一杯來食,之後去我之前介紹過的大堂巷食魚蛋,又或者去國華食雞蛋仔、夾餅都得! 編/攝:阿乃

024 澳門人講飲講食:好麵膳(麵食茶餐廳類)[已歇業]

0
024 澳門人講飲講食:好麵膳(麵食茶餐廳類) 今次同大家介紹的是一間平時久唔久都會去食既麵食館,佢個名好得意ga,叫做 "好麵膳"。   大家可以乘搭任何一輛途經水坑尾M記巴士站 / 對面水坑尾公共行政大樓巴士站 的巴士,於該站下車,沿馬利奧斜巷上就是了!步行約1分鐘內~~(由於水坑尾係大站,所以好多車都到ga!) 呢間好麵膳,我最鍾意食係既潮州白魚蛋 以及 豬頸肉,所以今次就食了潮州白魚蛋豬頸肉湯面(mop$19),由於今日冇套餐,所以要散叫,就貴左少少囉! 看下圖就是我碗麵既樣子啦! 有時佢d豬頸肉好林,有時就好韌囉!不過算係好唔錯,因為佢好多ga~~係個麵煮得arm arm好,而且唔會韌,亦唔會太林囉~ 不過佢位既就唔係好多,得7張檯,又係一到中午食飯時間就多數都冇位!星期六、日都係一檯剛走,又立即又有人坐ga啦! 如果大家食得特色野太多,呢間算唔錯既選擇,仲有係正中區,有時大家買野買到累都可以去試試!而且佢d野凍飲係 mop$8.5 - 10,熱飲都係 mop$5-7,勁抵啦~~仲要好大杯,又唔多冰,絕對唔扼你囉! 我成日介紹d澳門食店,梗係激死alvin、keith同阿當佢地~~因為我近期介紹既,都冇帶佢地去食過!haha~~(其實你地都食唔切咁多野啦~~得30個鐘~~係咪?) 編/攝:阿乃

023 澳門人講飲講食:生利咖啡美食(特色食物)

0
023 澳門人講飲講食:生利咖啡美食 這間位於南灣區瑪嘉烈餅店隔離的舊式茶餐廳,係澳門屹立了多個寒暑,直到現在還保持住一貫作風、一貫裝潢、一貫味道,亦一直都具備人氣的茶餐廳。 大家可以乘搭新福利巴士(因為我唔識澳巴):2、3、4、5、6、7、8、9、9a、28b、28bx、32、33 於葡文學校側站 或 殷皇子四世大馬路(即澳門廣場)站下車 或 相反方向的南灣時代商業中心站,步行30秒左右即可,至南灣CTM後街的所在地。 這裡出名d乜?佢出名既有3樣野~~ 1. 炸魚片 (美味指數達:9.5分)     為何炸魚片都出名呢?道道都有ga啦~~     沒錯,但呢度就係非一般炸魚片。你可以想像得到魚片可以炸到蝦片咁大,而且好似蝦片咁脆,一d都唔覺得食緊魚片,但又有陣陣魚味呢?哈哈~~     跟阿乃介紹既去食就冇錯啦!信我啦~~我成日都去幫襯ga!不過炸魚片就會有時未炸透,會有dd煙韌囉!不過就好唔錯ga! 2. 牛腩面 (美味指數:8.5分)      d牛腩好林,好入味,好似食牛肉咁。如果食得辣既朋友可以加勁辣,我呢就唔食得辣,所以我只叫一碟辣分開上,自己加落去,認為夠自己的程度就好了! 3. 豬扒包 (美味指數:8分)      佢既豬扒包雖然就冇乜特別,但勝在入味同超林,好似入口即溶咁既feel,我估當然佢鬆肉粉應該落唔少,但你咪理,人地就係林過哂出面d豬扒呀~~又食你唔死,有乜所謂! 最後我要介紹我平時食開既 "煎魚片河",其實是同樣好食,d煎魚片同出面整既有d唔同,唔知點解係特別香,同滑ga!有相睇呀(下面) mop$11 而呢個係同行者食的炸魚片香腸通粉! (mop $14) 呢碟就係分開上的咖哩辣啦!(免費任落) 另外我要同大家講一聲,落單既時候你一定要講清楚你要既係 "炸魚片"、"煎魚片"、"汆魚片"(用滾水錄熟),因為三種都唔同。而只有炸/煎魚片可以單當小食叫,其他都要跟面ga!大家可以看看價錢就有乜野食,真係好經濟ga~~ 這是店內環境呀~~如果撞正食飯時間的話,就一定會冇位,連有位坐低既,等食物來都等好耐ga~~平常下午茶時間就好快,幾分鐘就出ga啦D野食!(當然六、日就好多時就爆滿ga) 要做個識遊澳門既人,唔再停留大利同葡京,懂得捐窿捐罅做潮人,睇澳門人講飲講食啦! PS.佢地嘩鬼三人組可能比我激死,又冇帶佢地黎呢度食野! 編/攝:阿乃

022 澳門人講飲講食:札幌日式火鍋[已歇業]

0
2006.09.13  下大雨、大塞車 & 三號風球除下之夜晚 三隻嘩鬼星期一走左之後,我、雯雯、魚魚、Amy 臨時即興去了札幌日式火鍋打邊爐~~我地都唔係第一次來ga啦!今次就決定左一人一爐,坐吧檯啦~~   我首先揀選了豬骨湯底 (mop $ 6),雯雯 & 魚魚都係選擇了沙爹湯底 (mop $ 6)而amy最後都係揀左同我一樣既豬骨湯底。 至於日式火鍋我地食左d乜?唔好咁心急住~~你睇下餐牌先啦~~有好多唔同既餐,我地係一人叫一個餐ga~~ 雯雯 同 魚魚就揀了 海鮮配豬肉 & 海鮮配羊肉鍋  (每個為 mop$68)amy就揀左 海鮮雞肉涮鍋 (mop$68)而我呢就揀左澳洲羊肉涮鍋 (mop$42),看下圖看看我的羊肉鍋有幾多野先! 已經急不及待開給食啦~~haha~~唔等amy lu~~ 我係可以一個人食哂成份餐,之後仲食埋amy 1/3碟雞肉tim~~haha~~我都嚇親自己,竟然食左咁多野tim~~而且又唔係好貴之嘛!其實呢間d野食都幾唔錯,好有水準ga!不過就比其他店貴左d囉!食物分數:8.8分我就提議下次去內港灣,因為平好多,而且都好好食ga~~我去左幾次ga啦~~haha~~ 我地係食既途中都有叫野飲,我地三個都叫了coke~~而amy就叫了波子汽水,我地一齊來看看amy的雞手鴨腳開汽水,仲攪到我個位濕哂!因為我驚佢支汽水噴我,所以手震得好犀利呀! 鬼影變幻手呀!好驚呀~~ 我地又有影合照ga~~ 都影得唔錯ga~~haha~~(photo by 魚魚)(photo by amy) 如果未去過,大家都可以試下 下次去呢邊野,平均消費約60元左右啦!由於係自己打邊爐,梗係味道唔差啦~~hehe~~ 編/攝:阿乃

021 澳門人講飲講食:皇朝上行咖啡

0
021 澳門人講飲講食:皇朝上行咖啡 9月3日(星期日)同班friends去完打保齡之後就去左位於皇朝區呢間上行咖啡度high tea兼晚飯,因為我地去到都已經6:00pm,而且有兩位朋友一陣要去文化中心睇Theatre sport比賽,所以我地就草草咁食囉!下次先慢慢品嘗吧! 地址:澳門皇朝區 倫敦街84號 環宇豪庭地下 Y 舖電話:750 688營業時間:10:00am - 11:00pm人均消費:about mop$35 - 80 (視乎high tea 定 午.晚餐)交通:8、12、17、AP1 (文化中心站下車步行3 min),            1A、23 (成昌巴士站、建興龍DHL巴士站步行約3 min) 講完d資訊之後呢,帶大家看看店內外環境啦! 這條就是倫敦街啦,相中最遠的有個角突出來的就是文化中心,有好多廣告牌呢間就係環宇豪庭啦! 上行咖啡就係咁既門面,相信大家去到附近就好容易搵到ga啦!它樓高兩層~~ 店內採用葡歐cafe的風格,大門口旁有個玻璃飾櫃,牆上滿放了不同的西洋人物、映畫等的黑白相片,洋溢著懷舊及歐陸式風格。 店內的燈飾亦採用懷舊的燈種,吧台及開放式廚房,非常整潔!座位亦非常之舒適~~ 牆上時有裝飾壁燈,帶有新古典時代的感覺,仿如置身歐洲的coffee shop內的感覺。為了營造氣氛,還特意在消防喉、假天花處放上草葉,在其不完美的位置上作修飾。 通往樓上雅座的通道~~ 這是Lyrical Cafe的店內粉筆店名牌~~ 這是朋友的set sandwish的凍檸茶這是朋友的吞拿魚牛角飽~~味道不錯,中規中矩,有7分這是另一位朋友的煙三文魚牛角飽~~味道好好,個飽好脆,亦好唔同出面一般的牛角飽,未食淨聞就已經好香啦~~味道評分:8.7分 這就是那個set sandwish啦,45元正澳門幣。 這是本人的蘋果紅茶,它選用了英國的紅茶品牌茶包呀,未飲淨係個味就已經好香蘋果味,亦附有楓蜜糖。味道清優,飲落有陣陣的茶香,亦有楓糖的味道,建議要落蜜糖飲用會好味d!一壺可以飲到2杯左右。味道評分:9分。價格:18元澳門幣(尚算ok的價格,比小泉居仲平少少) 呢個係另一個friends既凍咖啡,味道佢話好得,我就唔知啦~~冇試過~~旁有一個set meal,我最想試就係no.2忌廉焗馬介休餐。68元澳門幣,有是日餐湯 + 沙律一客 + 主菜 + 白飯/意粉/薯角...

020 澳門人講飲講食:台灣帝鈞炭烤胡椒餅

0
020 澳門人講飲講食:台灣帝鈞炭烤胡椒餅 澳門近日新開了一間台灣過江龍加盟店,只售賣一種小食,就是台灣最出名的小食之一----胡椒餅。這店位於永樂戲院對面條巷,近日都見排長龍的情況才買到來食!(現在已搬到中區,賣草地繼續經營)   我係開業第二天去買既時候,已經係晚上8點左右都仲要排隊買,佢當時做緊試業,賣哂報紙做三日特價,每個8蚊!咁我果日去睇死亡筆記,順路梗係去買來試試啦! 試玩結果:佢就唔係好辣,我都頂得住!肉質口感不錯,餅厚肉多!唯獨有D外皮烤焦了!都有肉汁,不過唔多,8蚊一個都算貴,不過可以接受。味道一般,普通一個餡餅似的! 試食分數: 7分(因為唔係好驚喜的味道) 據今日的澳門日報報導,澳門這間海外唯一分店,日售2000個,每日大排長龍tim~朋友雯雯都有相關介紹呀:http://hk.myblog.yahoo.com/jw!MJeZi1WWGRse30vAnaB0XLU-/article?mid=490 有食過既朋友,可以寫下你的試食後感嗎? ps.順帶一提,除台灣之外,海外分店暫只有澳門這一家,香港都未有!所以大家過來澳門可以去試試,唔駛過台灣lu~ 編/攝:阿乃

019 澳門人講飲講食:西灣安記 (澳門特色)

0
019 澳門人講飲講食:西灣安記   它是一間老字號茶餐廳,佢最出名既係豬扒包。大家唔好以為taipa的大利豬扒包先係澳門豬扒包,呢間都係澳門豬扒包既俵俵者! 我最鍾意食佢d豬扒系列,包括:1. 炸豬扒干撈意  18蚊2. 豬扒包 / 多 (一定係炸ga)  8蚊3. 炸豬扒燴意  18蚊 除左豬扒系列之外,仲有好多選擇,佢粥粉面飯、腸粉、包乜都有。仲有d好攪笑既包,如駱駝肉包......不過本人就未試過啦! 佢既老鋪位於南灣既燒灰爐巴士站,可乘搭新福利6、9、9A、28B到達。仲有其他分店,包括位於:(中區)板樟堂 大堂巷聖安娜隔離(松山)何東中葡小學 對面(新口岸)中華廠商會大廈隔離好似仲有分店ga,不過唔係好記得啦~~ Tips:澳門馳名中外的澳門豬扒包賣點大解扣大利豬扒包  係  自製炭烤包為賣點,而唔係塊豬扒,而且佢豬扒有骨。西灣安記豬扒包  係   塊豬扒為賣點,它是用天婦羅的方式去炸豬扒,而且冇骨。葉熾記豬扒包  係  澳門首間發明豬扒包的食店,簡單來說就是澳門第一豬扒包,澳門豬扒包發源店。 咁大家可以按需要去食屬於澳門的豬扒包啦!ps.除大利外,另外的都唔駛排隊~ 其他澳門blog友可以幫我補充ga,又或者你的意見!我知道應該冇人未食過呢三間既豬扒包!(本人就最唔like大利,因為有骨,一不留神就咬到牙痛)thanks~~ 編/攝:阿乃

018 澳門人講飲講食:忙裡偷閒 (台式飲品)

0
018 澳門人講飲講食:忙裡偷閒 它是一間位於皇朝區酒吧街的一間台式飲品館,以Mickey Mouse為主題的食店!我成日都鍾意去呢間店,原因係我鍾意食佢既招牌小火鍋。   這個小火鍋只需40幾蚊,有麻辣 / 豬骨湯底,仲有佢地獨創的 "奶茶湯底",不過本人覺得個奶茶湯底唔係太好囉~~呢個小火鍋一,二人用就arm arm好! 除左小火鍋之外,我仲鍾意佢地既其他小食:1. 棺材板 (忌廉海鮮餡) 10幾蚊2. 炸芝士狗 (即芝士釀入獅子狗內)  18蚊3. 炸蝦餅  18蚊4. 炸魷魚鬚  18蚊 仲有佢地d飲品呀:1. 芒果綠茶 / 荔枝綠茶 + 彩色笱篛2. 芒果沙冰仲有d自創既飲品......不能盡錄 食品都幾唔錯ga!不過飲品就太甜,次次都要少甜或者叫佢另外比一杯冰加落去!如果去的話,人數就唔好太多,因為d檯比較細,而且好難拍到檯!最大果張檯係6個人! 係既環境好好,全部都係米奇老鼠既擺設同裝飾,連d碗、盤、碟、檯布等都係米奇!如果你好似我成日來咁,老闆就有折扣優惠卡比你,仲有得儲印花換米奇既精品ga~~ 現已經遷往高士德區呀! 編/攝:阿乃(由於是由手機拍攝,質素比較差!)

017澳門人講飲講食:皇朝區 葡萄園餐廳

0
今日為大家介紹的是皇朝區的葡萄園餐廳。這間餐廳逢週未及假期最好就book定位先啦!內部環境及格調都非常好,就此亦拍了數張給大家看看! 價格方面就偏貴,而味道方面就很不錯呀! 今次我地美食團又再出動啦!本次有四個人一同前往,我地叫了以下的項目:1.黑椒牛扒2.忌廉薯絲焗馬介休3.忌廉芝士燴意粉4.有汽提子汁x1、有汽蘋果汁x25.鮮檸雜飲 最後位位85元付款!我最欣賞就係忌廉薯絲焗馬介休,我好耐冇食過啦~~非常好食~~第二位就係黑椒牛扒,需說是6成熟,但其實都已經係9成熟,所以我會食,而且我覺得好好食!第三位就梗係個意粉啦!因為冇乜驚喜,大部分食店都一樣ga啦!(因為我鐘意食忌廉、芝士呢d,所以今餐我都好滿意呀!) 美食評分:89分 (美中不足係價錢稍貴,唔可以成日都黎食囉!) (仲有一部分相係 "相簿" --> "澳門食店" )編/攝:阿乃

016澳門人講飲講食:望廈台北小泉居

0
望廈區的小泉居,是一間格調與其他的小泉居不同,而且長時間滿客的。價格與其他小泉居係一樣。 到達方式:任一交通工具,於望廈體育館 或 新益花園 下車即可。 現在就看看內部環境吧!這是二樓玄關的盤景藝術。   這是以日式或中式涼亭設計的雅座,可坐四至六人。 我去這店至愛的窗邊舒適大梳化,好舒服ga!比樓上的木椅好坐,所以好多人都鍾意坐,以及等有人走時再轉到這些位置! 這是我點的冰水果茶,不過比我食哂d生果,同埋飲到所剩冇幾先影相~~ 我其實都幾鍾意去呢度hea~~真係個feel好好,而且餐飲都唔貴,又易泊位左,所以都係一個不錯的hea站!而且呢度做占卜真係一流ga~~不論氣氛與格局!編/攝:阿乃

濠食新煮意Food Idea

0
濠食新煮意Food Idea為澳門一互聯網綜合飲食指南,目的是為公眾提供全面的飲食資訊。資料庫現時擁有澳門過千間餐廳資料,並且會不斷更新,務求將全澳食肆資料納入其中。 這是從Blog友 Mel 引用過來的,如果各位想知多d,想了解多d,可以用下面的引用link,linking去她的blog度看看呀! http://www.foodidea.net/ 我亦希望大家blog友,下次來到澳門會找到更多好食好玩的地方,所以我會一直為大家提供澳門的食肆、好玩、休閒拍照等地方!期望各位一直多多支持啦! 阿乃

015 澳門人講飲講食:日本北海道美食館 (美食廣場類)[已歇業]

0
015 澳門人講飲講食:日刺北海道美食館 (美食廣場類) 位於漁人碼頭的東西匯聚內其中一楝建築物,這楝建築物有三間日本食店,一間(地下中堂)係sale新鮮魚生及壽司,一間係(地下內堂)日本北海道美食館,仲有一間係2樓吃一d高檔d既日本美食。 我今日同大家講的是位於地下內堂的 "日本北海道美食館",它是一個日本美食廣場,有飲品店,及四檔日本美食(包括:炸物及小食、便當定食、中華料理及丼飯、烏冬及拉面)。 我們今晚三人行到了試吃,買既野食雲集四個檔的,大家可以看看下圖:(首先是我們全部叫的食物及飲品,每位約70元就可以埋單,是檯面上所有的呀!) 食物清單如下:(共mop$223)(1)一set滑蛋吉列豬扒飯連烏冬+酸菜 mop$40(2)一set炸天婦羅飯連烏冬+酸菜 mop$48(3)一set辣蝦定食 連麵豉湯 mop $45(4)兩客牛肉漢堡薯餅 mop$30(5)一客日式炸雞件 mop$15(6)兩杯鮮檸特飲 + 一杯鮮橙特飲 mop$45 我地先講講份量,一set基本上已經夠哂飽,只不過我地第一次入來試,諗住試多d品種,試試個質素ok唔ok,而且我地又影相,d服務員仲以為我地係飲食專欄記者tim~~我叫我是(1)號,基本上非常美味,豬扒有口感而不太韌,幾好食,飯當然用珍珠米啦!至於個素烏冬d味都非常好,而且我like食面、烏冬多過食飯呀!haha~~ 小食方面呢,先講牛肉薯餅,這個就真係推薦大家去食,唔會太滯,炸著蓉餅中間夾了粒粒牛肉碎,口感一流,味道唔會太鹹,真係唔錯,而且又附了一個唔知乜醬,但係大家都冇點,可能醬既味道不太好!可改善的地方是著餅皮可以再脆一點就真係一絕啦! 雞件方面,表現一般,賣相亦一般,味道偏鹹,所以要飲多d水,一一般般的水準,但就唔會有骨,剩係有肉姐! 飲品方面都不俗,我叫的是鮮檸特飲,其實是一杯青檸梳打+少少雪碧,酸酸地又帶少少甜,都幾唔錯呀!15蚊一大杯,都裝得幾滿,唔錯!至於另一個friends就叫了鮮橙特飲,是一杯橙味soda,同我地果d差唔多,不過有樣好笑的是,佢塊橙剛剛就隻杯咁大,好惹笑! 總括來說都幾ok,不論賣相、座位、環境及味道方面。今餐我畀85分,唔知其他兩位試完有什麼評價呢?如想看多d相,請到相簿-->澳門食肆,謝謝! 如果要看其他兩位同行者的評價可到下列topic:魚魚Cafe:又到星期六,你有乜節目?雯雯~~豬:北海道美食館......

014 澳門人講飲講食:東望洋餅店 (西式餅店類)

0
014 澳門人講飲講食:東望洋餅店 (西式糕點類) 位於皇朝區成昌後面,它是一間Coffee shop + 西式餅店。價錢公道,比一般的coffee shop平少少,格調好潮,帶有葡國式的擺設,不俗呀!我成日都會買迷你芝士批(5蚊3個),仲有芝士軟包(5蚊個)。但次次都趕時間,一係就食左野,所以未坐低飲野呀!我d friends話好好,味道ok! (下圖是店內座位區及擺設) (下圖是由門口影入去,是否很不錯呢?左面冇影度的是面包區) (下圖是服務台,下方沒有影的是西餅急凍櫃) 由於佢唔比人地影佢地D西餅及面包(可能驚人抄野,及對方來check價掛),而我亦先徵求佢地既同意,佢先比我影幾張相! 講返佢d面包,其實會比聖安娜貴少少,西餅就比金滿堂平。佢重有曲奇餅同生日蛋糕訂造等,基本來說都是一間不俗的店,每逢中午、傍晚都好多OL、辦公室人員去買野食,而六、日就多d去hea既人。 交通方法:巴士 1A、8、17、23都可到達皇朝區,在成昌附近巴士站下車即可。步行至餅店約半分鐘。(皇朝區由於好多香港人都唔識去,所以建議大家看一看澳門地圖做少少資料搜查,再唔係上到車問司機。)(因為皇朝算係澳門的飲食集中營,什麼菜都可以用皇朝區找到) ------------------------------------------------------------------------------------------Update :2006-06-11 9:40pm  (新加入下列兩幅新相) 下圖是堂食區的舊澳門相片牆壁,多了一份緬懷澳門的格調! 這是由堂食區影去counter,有少少手震tim~~ 仲有一張係堂食餐牌,大家可以去 "相簿--->澳門食肆" 度找一找,不便貼人地d價目出來! 編/攝:阿乃

013 澳門人講飲講食:銀禧粥店 (粥品麵食類)[已歇業]

0
013 澳門人講飲講食:銀禧粥店 (粥品麵食類) 這間又是伴隨澳門中區成長的老牌粥店之一,現在比而前貴了好多,但仍然咁好食。位於白馬行的Inshoe's Net對面,由議事亭一直向bodyshop行,到bodyshop後再直行到g2000 & u2後,再直行就到。 銀禧粥店再直行就是國華、信達城、天神巷啦! 它的粥品、湯麵都很不錯,唯獨比較貴,要成14蚊一碗,比起黃枝記平,但比起盛記就貴左一倍呀!當然盛記沒有麵食,粥亦只有皮蛋瘦、白粥兩款啦。 大家行到肚餓,但又唔想吃小食、甜品,想清清地,除了新馬路果邊的盛記白粥,噴水池那間貴到嚇死人仲要排隊的黃枝記,還有一間銀禧呀! (都係未有影相,遲d補貼返啦!)編:阿乃

012 澳門人講飲講食:國華小食集中地 (街頭小吃類)

0
012 澳門人講飲講食:國華小食集中地 (街頭小吃類) 位於白馬行國華戲院地下,是現在中區的小食集中地。 有很多很多野吃,包括:韓國烤魷魚、夾餅雞蛋仔(跟009所講的同一老闆)、魚蛋小食(是009所講的老闆開的)、台灣可樂餅、各式果汁、鮮果撈......都有。 每逢放學、假期、節日,那裡絕對係人山人海,真係針都插唔入呀!而且價格都係好平,從幾蚊到十幾蚊左右。果汁大大杯;鮮果撈就生果滿一杯,果汁少。 各位如果過來澳門,除了懂得去我以前講的大堂巷、大堂街、議事亭之外,還是懂得行白馬行呀!白馬行就是議事亭尾的U2、G2000之後的行車路,這條白馬行可以一直通去水坑尾,荷蘭園波鞋街。身為精明的你絕對要識呀,可以慳返搭的士的錢,而且又好快到荷蘭園呀。 參考時間:(由議事亭、板樟堂的U2,G2000出發)回新馬路     步行2分鐘到草堆街     步行30秒到大三巴     步行2分鐘到大堂         步行1分鐘到國華         步行2分鐘到水坑尾     步行4分鐘到荷蘭園     步行6分鐘 (未有時間去影相呀!遲d補貼啦!)編:阿乃
Macao
多云
26 ° C
26 °
26 °
83 %
1.5kmh
40 %
週五
27 °
週六
28 °
週日
28 °
週一
28 °
週二
29 °

社交網絡

12,042粉絲Like
1,070追隨者Follow
11,760追隨者Follow
2,483追隨者Follow
43追隨者Follow
3,400用戶訂閱

最人氣文章