南韓・旅體驗

《06'韓國秋葉行》08 -  昌德宮 由仁寺洞行過去昌德宮只需15分鐘，一條直路唔駛轉彎，好易搵ga咋！條街好勁ga！d韓國大企業玩哂打對台ga！大家看看！   現代汽車辦公大樓！ 韓國LG集團旗下 Samsung辦公室 (係正現代對面) 之後見到一個叫 "空間" 的私人藝術空間，由建築及外觀上都好特別，起碼比果d企業辦公大樓來得靚！ 過左果三間建築之後就到昌德宮啦！ 呢度係昌德宮的售票處！ 售票處對面的一棵超美的大樹！ 這是昌德宮的入口---敦化門站在門內的人群是等2:45分的韓語導賞入宮參觀的！因為昌德宮有個規定，就是宮內每日都有安排固定的導賞團，有韓語/英語/國語三種，均不同時間，而遊客(包括旅遊團)只可在導賞開始時入內，並只可以跟隨宮內導賞，不可隨意亂走！而導賞團大約1個半小時的！行走宮內9成的地方，每個導賞都有自己的特定行走路線！大家去既時候一定要睇清楚國語導賞的時間，而且唔好遲到，如果唔係你可能入唔到去ga！ 這個昌德宮係首爾內最靚既宮殿，不論秋葉大自然之美，或是宮廷大建築之美都非常高水準！下圖是昌德宮於每個門上都架上鐵絲網，原因係唔畀d白鴿雀仔係上面停留築巢或痾屎，韓國人呢一招大家應該學下！ 呢個係昌德宮大地圖！(我地結果係行哂ga，導賞姐姐用了個半鐘！厲害~~)韓國宮殿跟中國的宮殿架構上基本一樣，都係三進式朝拜門格式！何謂三進式？就是大門，中門，正門！稱為三進式，另在位者/來訪者/朝臣覺得皇上是高不可攀的自大格局！但同時亦是保安的一環，需經過三重關卡守衛才可入到心臟地帶呀！而家的進善門係第二度門，即是中門！ 有好得意的風景，圖中是一條城內河！ 入了進善門就發現有三階層，中間是正道，供馬車、皇上等行走，旁邊的是其他臣子行走，而沙地部分就沒有限制！我當然行皇上行的啦！haha~~ 一幅三階路的藝術相！希望大家會喜歡！ 仁政殿！是皇上辦公的地方，所以你見到地上好多牌。這些不是神主牌呀！ closeup一下畀大家睇先！係官階上朝的企位，分為正從一至九品，跟中國的一模一樣！由殿開始最前的是正一品，這也是上朝議政的地方！ 但大家可能不知，其實昌德宮唔係正宮，這是副宮！即是正宮"景福宮"有什麼事，或皇帝渡假等先會從正宮大舉遷至 "昌德宮" 辦公！但 "昌德宮" 不論裝修、風格、面積、風景等，樣樣都比正宮好唔知幾多倍！(景福宮都係好唔得囉！) 這是仁政殿內堂的景！真係好中國feel呀！座上有兩個太陽，大家知唔知點解？haha~~一個係皇上，一個係皇后！ 下圖是望春門，向東邊的門！ 這是一幅好美的宮殿與天空的圖！屋簷中間的其實是煙囪位，它是一個壽字！(全個宮殿有四個，每個都有不同的字，分別是 "福"、"壽"、"安"、"康") 韓國古代的地熱暖爐，原來是燒柴呀！那sleep在內的，可能隨時變燒豬呀！ 大造殿大家估唔估到係有乜用途？(從字面就猜到！)沒錯，係皇上與皇后/妃子交合做公子公主的地方！ 同仁門呀！(跟同人堂係冇關係ga！不過佢係宮醫使用的一個機關！) 這是宮內的展示廳！有舊式轎、皇帝的戶外紮營、仲有西洋汽車tim~~真係超勁！ 之後就去宣政門囉！這是宮內雖一使用玻璃青磚瓦式建築的宮呀！(所以你見到同其他d屋簷係唔同色ga！) 之後就去了後宮參觀昔日皇后及妃子所住的地方，其實比較殘舊呀！原因係韓國後宮生活比較平淡！絕對不是大長今那些超靚建築囉！ 呢個係"樂善齋"，係唔知邊一朝的皇妃所住的，之後就係後一代的公主所住的，原因係好似話話公主與外國鬼佬通婚，這是皇室不能接受的事，所以特築起了這個齋給那些皇族居住！亦曾經住過一個有俄羅斯血統的韓國小王子ga！原來以前的韓國已經咁open！真係犀利呀~~ "樂善齋"的大空地庭園！有好多龜背紋為設計重點的龜紋牆，以及大庭園！這是寓意歸於平靜的意思！跟中國人的風水學說有少少相似！ Closeup牌匾！可能大家都會好有疑問，為什麼韓國宮殿係全部中文字呢？原因係以前的韓國，即係高句麗國，以及百濟國都係中國的藩屬國，好多資源，包括文字、曆法、技術等都是由中國借用過去的，所以昔日的韓國流通的是繁體中文，到了二次大戰時期，韓國被日本侵佔後，韓國復國並創立了完全冇人明的韓文，逐漸將中文棄用，使現在到韓國處處都少韓文，中文已經幾乎沒有了！但在韓國的昔日文獻及古藉內，仍是以中文為編寫語言，包括宮殿的名牌都是。所以現在韓國人還在努力的去漢化，立韓文主導的工作，各古藉翻譯工作仍在進行中！ 下圖是導賞姐姐呀！也是來到參觀昌德宮的最後一個景點---不老門！相傳在不老門行過會年輕十年！haha~~我行過三次呀！(仍我咪即係未出世~~haha~~事關我得廿幾歲！) 喂住導賞姐姐就帶我地上山，之後行小路回大門口！(如果下雪、下雨的話，她說是不會上山的！因為d石好滑，大家會好唔安全呀！) 下一篇我會帶大家去看看我係昌德宮所拍下的美美紅葉！(因為我係呢篇cut哂出來！)希望下一篇得到大家的熱烈回應呀！(因為近期回應的人越來越少！但觀看人數沒有明顯的下降呀！) (待續：昌德宮紅葉篇)編/攝：阿乃

《06'韓國秋葉行》07 -  鍋村莊 行完好多人既仁寺洞藝術中心之後，又破哂財咁，都係時候要醫肚啦！今次揀了一間幾出名既店，叫鍋村莊，主要食韓式料理--->泡飯與石頭飯的！   這間店位於仁寺洞大街入口，那間面包店的對面！(看下圖：鍋村莊) 門口需從建築物側面進入！門口樓梯~~ 有牌介紹它的特色食品及種類！請上2樓~~ 店內環境！(注意：需要脫鞋呀！如果有腳臭的人士不要來這影響大家食慾！謝謝！) 這是我們5個人所叫的午餐！(只叫了四個！)韓國人其實是不會share食野，所以他們覺得我們5個人只叫了4個set就好奇怪，而且一直唔走，企在這等我們叫第5個，之後我們跟她說我們夠了，她投下奇異目光看我們，再者跟各伙計說，讓個個伙計都看著我們呢！非常尷尬！亦促成我們以後叫外賣回酒店食的習慣！這是經過本人親身驗證，一人一份的情報是絕對正確的！(因為韓國的東西不太合我們食，款款都辣，我們只有呢間叫d，果間叫d，回酒店先share食！真慘！) 首先就是牛肉碎紅豆拌飯，一定會跟d我們冇人食既泡菜！ 牛肉石頭鍋湯配紅豆飯！又是有討厭的泡菜！ 這個就是泡菜牛柳石頭窩飯！(這個最難食，又鹹又辣) 這個就係我喜愛，亦叫arm大家胃口既穩陣菜色------海鮮石頭烏冬！ 我地係食哂d主菜，跟住先試d怪泡菜，又引來所有伙計一陣狂掃我們這檯，真的太不好意思！趕快食完趕快走！(因為我地不想浪費，所以儘量食呢些泡菜，但有些真的沒辦法，一係辣到噴火，一係鹹到發瘟)終於好快咁離開左呢個比人奇怪注視的地方了！ 我們又回到仁寺洞逛一逛，因為距離昌德宮的3點鐘華語導賞有一段時間！(它一定要導賞才放人進去！)回到仁寺洞又去了看一些攤販售賣的東西，但真係貴到離哂譜，咁梗係冇賣野啦！反而有韓國傳統舞獅及舞蹈，我們就看了一下！附近有一檔買紅豆餅的，我們又去了買來試試！(1000w 9粒) 味道算不錯啦！QQ的，味道略淡，但有紅豆味！ 買完食完就差不多時間啦！我地就開始行過去昌德宮啦！亦拍下沿途的景色！ (待續：昌德宮)編/攝：阿乃

《06'韓國秋葉行》06 - 仁寺洞藝術中心SsamzieGil 係仁寺洞大街行完之後，我地去左位於仁寺洞中術中段的 SsamzieGil，這間藝術中心是我強烈建議大家一定要去一趟，因為好靚又funny囉！   這是正門的招牌，好得意的斜磚式牆壁，配以藝術中心英文名/韓文，仲有果隻抵死公仔！ 一入門口就有一個成4個人高的膠人歡迎你，非常滑稽呀！背景d天空藍色傘都好靚！其實藝術中心係做緊一個裝置藝術的展覽呀！(係呢度都謀殺左我好多memory stick space呀！) 樓梯旁的香蕉牆，我地見到有一隻假蕉跌左落地下，我地走去執返，幫佢貼返上去！haha~~ 門口的另一邊有好多人聚集於一店舖內，唔會仲乜呢？ 哦！原來有人表演搥年糕，但韓國呢隻需然好似日本年糕，但佢應該唔係來的，因為係墨綠色，仲要係鹹鹹地，d味都幾怪！但阿鐵人竟然買左兩盒，話做宵夜喎！(凸眼中...) 樓梯上有好多好爆笑的人仔！的叫佢做吸管人！隻隻矮dut dut~~ 嘩！好美既雲海呀！藝術家係以天空做概念，因而做了這個裝置！以無數印有天空藍+雲的紋色，置於藝術中心的天井頂~~型！ 呢間就係藝術中心內其中一間店，專賣自創品牌-----星星飾品，我係呢度都花費了不少金錢ga！用左幾萬won ga，買了數樣飾品~~(又一次證明韓國除了化妝品之外，真係樣樣都好貴！) 呢度係開工作坊的位置！擺放了各種材料工具在此！ 上到2樓，又用另一角度去看看這片吸引各個入場入士目光的雲海！ 呢度係3樓呀！已經見到個頂啦~~ 3樓設計成一個休閒的園林石路的風格！我好鍾意呢個3樓，因為係鬧市中，通常藝術文化的再生，另一個地方變成都市休閒點，一個綠色空間，真係最好不過！反觀澳門、香港又得唔得呢？d生意人會唔會分一d空間出來建設綠化，回饋社會，給市民一個優靜空間，呼吸一口新鮮空氣呢？ (待續：鍋村莊午飯)編/攝：阿乃

《06'韓國秋葉行》05 - 仁寺洞大街 去完南山韓屋村之後，搭返地鐵由 331號忠武路站，乘至 328號安國站下車(800w)。往仁寺洞大街出口上走，回到地面，就已經見到仁寺洞大街的入口了！(下圖就是仁寺洞入口的街區地圖牌)   這個是位於仁寺洞街口的觀光查詢站！ 無無聊聊係度影燈柱囉！ 呢個都係o係仁寺洞大街街口(觀光查詢站對面)的大型雕塑！我自己就覺得佢好好笑囉！(有d似千語千尋果隻黑色物體) 有咁多仁寺洞大街的地標，大家應該唔會找不到仁寺洞係邊啦！自己應該有信心找到了吧！請僅記，我地當中係冇人識韓文ga！我都只識日文而已(有些發音基本與日文相同，所以有d聽得明！)亦唔知點解，可能我太似日本人的關係，去度日本就成日畀人當左我係日本人，向我問路(包括本地人)。而去到韓國仲死，又畀當地人當左我係韓國人，狂問我路，我d friends已經狂笑ga啦！ d friends仲抵死到成日講：『你睇下！我地5個人當中，d韓國人淨係揀你來問路，係唔認係韓國人都唔得囉！』(因為我5日來，畀d韓國人問路不下5次囉！)我真的想問，我似韓國人嗎？還是似日本人呢？抑或是兩種都似？ (那我會認係日本人多d囉！) 講左好多廢話tim~~入返正題先！我地係食午飯之後，大家都有少少肚餓~~haha(其實係為食！)於是我地係街邊賣野食囉！首先有賣 "街邊婆婆燴栗子" (3000w)試食後：非常乾，同澳門既甜炒栗子好有分別，韓國既唔太好味囉！(C小姐 同 賣米 係度好得戚咁比我畀佢地相！) 食完栗子，我地係兩三步之隔，有一間面包鋪，佢發出陣陣面包香，我地又忍唔住啦！結果，除了栗子之外，我地又立即去左買成條pizza咁既面包食！(每位於400w)下圖是面包鋪d師傅係度整緊面包囉！(我又係度偷拍囉！我仲扮哂影d friends咁！) 呢隻就係我地分屍個pizza包既圖！你看看賣米著幾多衫，羽絨、頸巾乜都齊；C小姐就冇佢咁多；而我就1件短底，1件薄長衫，再加1年薄外套就行出去啦！仲有呀鐵人W生(冇入鏡)，佢同多都係差唔多囉！但當日其實只有10度左右！ 食完小食之後，終於正式行下仁寺洞大街啦！大家看看仁寺洞大街全景，嘩！美呆了！好靚又好有藝術味囉！ 街道上的一景，竟然有楊柳樹，映襯著街道上的畫紙工具鋪、陶藝鋪，真係好有國畫feel囉！ 街道旁的藝街家擺放作品！以及街道上的特別設計，到現在都未估到佢係乜，以及有乜作用！ 又一特別之處，樹根的裝飾，全部寫哂韓文，唔識睇！不過係幾得意呀！ 仁寺洞的小橫街，好有懷舊風味！ 於仁寺洞中段，見到一個私人畫廊！呢位張曉剛d畫作，之前係澳門都有擺個展覽，咁arm就係我地幾個負責果個展覽既！來到韓國又見佢既畫作，咁係要影影相，回味一下之後一齊做野既時光啦！ 雖然C小姐同賣米已經去了其他行業工作。我亦沒有在藝文館工作，而我回去了原來的藝術館工作，但我地幾個經常出來聚一聚，去下食飯，去下旅行，去下玩咁！都幾好ga~~ 下一回同大家位於仁寺洞的藝術中心，這是我地到仁寺洞的重點，而整區一直都瀰漫著濃厚的藝文氣息，咁又點少得我地去參觀呢？ (待續：仁寺洞藝術中心SsamzieGil)編/攝：阿乃

《06'韓國秋葉行》04 - 南山韓屋村 一大清早，9:30就出門了！開始第2天的行程。我地從東大門運動場站 坐4號線 到423號忠武路站 下車 (800W)，在3號 or 4號出口，步行3分鐘就到！來到了我們的第一站，南山韓屋村 (參觀費用：Free) yeah！   來到這裡，已經發現有一架永安旅遊巴，心想永安d團咁早ga，十點就已經睇緊景點！我地來到門口啦！都唔係好靚o者！可能係冇乜特別的關係，而且都唔係太宏偉，這就是尹建出來給大家看看的主題屋吧！ 門旁有另一小門口，終於見到有中文字啦！因為韓國以前是中國的附庸國，所有國史資料都係用中文來記載，所以韓國以前係識中文的，但先從有韓文之後，政府大力推行 "去漢化"，所以現在的韓國街上已經幾乎看不見中文了！這是它的歷史，不過我覺得冇乜特別，而且真係都幾假下！好彩擺佢係第一o者！因為之後我地去參觀既，真係令我地大開眼界呀~~靚到死呀！ 這是南山韓屋村地圖，其實唔係好大！ 大家又可以估下呢間建築物係有用途既，但現在的真正用途係乜呢？(設係門口ga！) 呢度係入去之後，面前的一條運河仔，都幾靚ga！算係有特色既！ 呢個係一個亭台大舞台！ 有些類似d古代中國大戲既木製大舞台！旁邊仲有d紅葉tim~~ 這是由南山韓屋村遠眺 N首爾塔 的景，你看看都有不少紅葉ga！(不過唔夠我地之後去睇既昌德宮靚) 這是韓屋大操場內！好有沙地feel~~各位親愛的澳門朋友~~是否懷念工人球場呢？(而家變左新葡京啦！唉~) 你地看真一點，d牆其實幾特別ga！石+白灰！ 呢幅又唔同既！d石比較平均，而且d混凝土幾結實！ 呢度係一位韓國皇后寖室的戶外呀！都幾靚呀！d韓國人既房！大家睇大長今、醫道都應該見唔少囉！呢度係果個唔知乜皇后既寖室呢！ 好靚既紅葉呀！ 我地睇完d屋之後行左上山，見到好靚，所以停下來影相呀！呢張我叫佢 "寂寞‧紅葉‧孤燈" 呢張係山腰上一個涼亭，有紅葉襯托，都幾唔錯ga！ 呢幅係亂影，但又影左d藝術出來囉！ 呢條係下山的小水道！(好有味道的郊園景) 係韓屋村見到大公仔，梗係要影返張相先啦！由上而下：我、C小姐、賣米 好快咁睇左1小時左右，準備乘地鐵去安國站的仁寺洞大街睇野啦！今集比較少解說，真係冇乜野可以講！所以畀多d相比你地睇囉！下集會多返d字啦！下集見~ (待續：仁寺洞大街)編/攝：阿乃

《06'韓國秋葉行》03 - 去明洞食晚餐 我們放下行李，整理行裝之後，就準備出發去明洞食晚飯啦！但呢個時候，阿W生竟然要食一個杯面先，真係比佢激死呀！   之後再去到東大門運動場地鐵站內買一張 T-money 電子儲值卡 (可乘搭全線地鐵，以及各線巴士)，儲值18000w，按金2500w！(兌換率為 1000w = 8.2 hkd) 攪完一輪就去明洞啦！ 由東大門運動場站 去 明洞 需要搭 第4線(淺藍色線) 於 424號明洞站 下車！(T-Money需扣 800w、正常買票需900w) 之後我地去了 明洞餃子 食晚飯！(係韓國的食店有一個不成文的規則，如果你幾多人入去，就要叫幾多樣野食，唔可以叫少一樣，但可以叫多，所以亦導致我地以後好多都係叫返酒店開餐！)原因係佢地唔興share野食，興一人一份，所以我地都幾慘！ 明洞餃子 係本本旅遊指南書都有介紹，咁應該都唔錯啦！(仲有就係旅遊書上寫左價錢，佢係可以接受的！)所以我地就根據地圖搵到呢間野啦！入到去真係好多人囉！好彩我地都有位~~ 介紹一下我地叫左d乜先！(由於我地5個人，所以要叫5樣野！)呢間店有個特色，就係叫完要立即畀錢ga！絕對唔係食完先結帳！(怪怪的~~)下圖：兩籠明洞餃子、兩碗雲吞面、再加一個超辣泡菜面！每人都係6000w(約50hkd)，總數係30000w，抵呀！ 其實我地係食唔哂ga！原因係今日大家成日都係坐飛機坐車，都冇乜胃口！加上我由於唔夠訓兼早餐飲左咖啡，又引發左我既"腸胃焦慮症"，成日都胃痛，有時都幾辛苦下！所以更多冇胃口啦！仲有果個W生之前食左杯面，點會食得落先得ga！ 而且我地5個人當中，4個人都唔食得辣，咁叫左果個超辣泡菜面點算？當然就係C小姐負責啦~~因為得佢一個食辣，而我就一定唔可以食，如果唔係明天都唔駛繼續行程啦！佢地幾個就唯有將食完既雲吞湯來過冷河，將d辣過走，再幫忙食！(旁邊d韓國人就已經覺得我地好怪囉！) 大家唔知有冇留意，佢果d籠係膠造的，同我地中國式的竹籠唔同ga！ 食完野之後，我開始好返少少，不竟我已經係酒店食左胃藥，已經好左好多！當然，現在都係8點幾，我地梗係行下街先ga啦！ 明洞最出名，最多人就係呢三、四條購物街啦！你看看，什麼牌子都有，有d似澳門的噴水池，及香港既銅鑼灣囉！(又多人又多街鋪) 我地期間都入左唔少鋪頭，需要佢地都著左唔少衫！(識我既人都知我係熱血青年，唔怕凍！所以我都係1件短底，1件薄衫，再加1件褸就死出去ga啦！) 除左我，團中仲有個鐵人，都係唔多怕凍，佢就係同我同房既W生啦！其他人就梗係羽絨、毛毛、圍巾都出齊ga啦！ 當時雖然都幾凍！(因為早上落過雨，晚上9點左右的氣溫只有-3至-1度左右，但其實間間shop都有暖氣，有時仲熱到我呼吸唔到，因為真係太熱啦！) 但我地就繼續行一行，不竟我地幾日都會來這裡找食呀！所以熟習一下有d乜野買都好丫嘛！ 大家都可以比較累啦！行到10點左右已經開始想走，返酒店休息！加上越來越凍，所以大家都同意！ 這幾張都係o係明洞果幾條街影ga！好多時都係我係門口等既時候影既！ 第一天大家都冇收獲！好啦！我地回酒店啦~~day2見！回程與來明洞一樣，都係搭4號(淺藍色線) 回 422號東大門運動場！(都係T-money 800w)大家雖留意！有些站會有2個或以上號碼，原因係該站有不同線路，即為轉乘站，所以有不同的no.如東大門運動場站，有3條線，屬於大站來的。它分別有422號(淺藍色4線)、205號(綠色2號線)、536號(紫色5號線)。所以你要搭去邊，先睇顏色，再搵站no.，easy好多啦！(仲有就係全線地鐵都有中文，大家唔駛驚！) (待續：南山韓屋村)編/攝：阿乃

落坐車，我地梗係要返酒店先啦！ 不過一落車都要周圍問人點去酒店，d韓國人一直指我地向前行，穿過好多巷咁樣，終於出到去大街！雖然我有酒店地圖係手，亦知係向果個方向，但地圖係冇顯示我而家行黎果條路囉！地圖只係叫我地由大街行，我而家行緊d小路囉！so唔知會去左邊囉！(其實未去之前係d討論區已經見到個人都係行小路，話快好多！)好彩最後行到一半之後，我就見到Co-op Residence，咁就好啦~~因為Western Co-op係佢隔隔離咋~~ 最後終於搵到啦！睇下下面呢幾張圖啦~~就係酒店的內貌！ 係大堂裡面仲有兩部電腦，(佢好似日本的Toyoko Inn咁囉！非常唔錯！)可以畀住容免費上網呀！而且我已經係靠牆果部電腦裡面set左中文，可以用速成打中文，而靠路口果部我冇set到，好似打唔到中文！ 好啦~~之後講下房間先！呢度就房間既玄關位！ 呢度係廚房區！有張可伸縮的檯，又有微波爐、抽油煙機、碗碟筷子、杯、水煲、爐頭、平底獲、洗潔精同易潔布，亦有好多廚櫃比你擺野！ps.檯面既杯面、餅乾係自己帶去ga~~ 呢度係書房區，都係有好多櫃比你擺野呀！ 呢度係由睡房區影出去，佢有拖鞋比ga，而我就慣左唔著拖鞋，因為韓國興地板裝暖管，地板好暖呀！係地下既行李箱係我，雖然帶左厚衫&暖包，但完全冇用過，都係著返d薄衫就已經OK啦！(因為韓國天氣係有風凍，冇風唔凍，不論係零下定係幾度，而且度度都有暖氣，如果你著住好多衫，你一入室內就會焗桑拿咁，抖唔到氣呀！) 跟住呢度係睡房區既電視櫃！ 呢度就係睡床！最唔好就係雙人房張床勁close，只係得一隻腳咁粗既空位，同一張雙人床冇乜分別囉！ 好啦！現在介紹厠所啦！麻雀需小，五臟俱全！又有一對浴室專用拖鞋！佢真係好鬼死似日式咁ga~~ 呢間有大、中毛巾各兩條、備用厠紙、梳、風筒、肥皂等！(唔好以為我點解講得咁仔細，事關韓國既酒店係唔設有風筒、毛巾、拖鞋同沐浴用品ga！)但呢間就有啦！不過要自己帶沖涼液、洗頭水、護髮素！ 浴室位置~~ 沐浴水龍頭呀~~以及一旁既架層！ 最後要同大家介紹，玩左我地一日既 " 沖涼熱水 兼 地板暖氣 再兼時間及顯示器"，完全韓文，初時完全唔明點用！結果研究左好耐就找到一張英文版圖，但睇住張圖都係唔係好識用，就問左酒店職員。 原來右邊米粒制要開哂佢(著綠燈叫做開左，而唔係英文圖示的Very hot)右邊第四粒制就係沖涼時先要開，係煲熱水用的，否則就冇熱水沖涼ga啦！(亦唔係英文所說的Quick Boiling)右邊樓下著紅色燈係代表水溫(英文版終於arm返一次)到左邊頭三盞燈，係冇著過ga！(so唔知英文arm唔arm)之後大扭制係控制地板既溫度，我通常開55-60度，咁成間房先會暖囉！(英文就冇講係乜野既溫度)最後左下角的timer冇用過(都唔知佢係控制煲水定地板，又唔知係分2,4,6...分鐘定係2,4,6...個鐘) 總結：張英文版有都等於冇，呢解釋有5成錯，3成唔清楚！即係等於廢物！(真係我地唔問過都唔識用)酒店就真係非常唔錯！又有書房同廚房！建議最好跟package book，否則一晚要成4百幾5百蚊，如book一個月就平d囉！Western Co-op 比 齋Co-op 大一倍，設備齊好多，只不過係隔隔離，所以建議住Western~ 其實好多friends睇完d相之後都話佢唔似酒店，似宿舍多d，但係真係酒店，有d類型酒店式住宅，而且仲有gym、洗衣乾衣室 ga，不過唔知幾樓！係4星酒店來的！不過我就好滿意囉！綜合評價比佢93分啦~~之後介紹下酒店周邊風景及便利店！係韓國最多就係GS25便利店，係屬於LG集團，大家要知，而LG呢個品牌，係韓國已經改哂為GS啦！所以GS25就係以前的LG25便利店！而LG油站等都改哂名！韓國冇LG ga啦！LG係中國牌黎ga啦！ 呢度係對面果個公園囉！ 呢d係韓國既燈柱街招廣告！ 呢個係附近d大型批發及零售商場既多棟大樓~~ 呢個係從酒店窗外影的東大門夜景！右邊的就是東大門多間大型批發零售商場！由早上10:30開門直至凌晨5:00 ga！所以行街可以留返夜晚，白天可以去下樂園，逛逛宮殿及文化遺產，抑或去去博物館都可以！(大多博物館、宮殿等，秋冬天都係5點、6點左右close ga！)(待續：明洞街道及晚餐篇)編/攝：阿乃

大家等左好耐既韓國遊記出爐啦！唔好意思~~真係近排比較忙，整理左少少就post出來先啦！今次我係去左5日(自助遊，06年11月份)，上幾篇都有一d我去韓國既資料同一d小知識及一些見聞！今篇開始就有遊記同相啦~~ 同上一次去日本一樣，又係搭早上9點多的飛機(搭國泰機)，不過係飛韓國仁川，唔係飛日本成田o者！果晚又係冇sleep到，上網、msn、打blog，之後去沖涼，執埋少少野就差不多凌晨3點啦！仲有一樣野係勁攪笑，係keith目送我離開屋企出發ga！(係msn度)之後就搭凌晨四點船過香港上環，再轉機鐵入機場！ 入到機場都係6點幾，去左Super sandwichs食我至愛既早餐~~再過對面買書上機睇，之後就返上去A區get air ticket去check in啦！ check完in都已經8點左1右，就入閘行下，因為未試過行機場禁區d店，我行書店比較多，d friends就行迪士尼專門店！9點多去到閘口排隊上機囉！ 今次我地5個人，分別係我、W生、C小姐、賣米 & 肥宇 (其實都係以前d導賞員同事黎ga！今次係第一次一齊去旅行~~) 上到飛機，我又開始黎啦~~黎乜？事關我都講過，我驚離心力，而且我更驚不安全感，雖然我知道空難機會比任何交通工具要低，但亦知道一出事都一定冇得救。所以Take off、landing、遇氣流、天氣不佳的情況我都好驚，又好擔心！(絕對會出洋相)此終隻隻天蠍都係成日覺得唔安全ga嘛！只有能掌握既野先係最安全~~ 呢幅係係機上面，已經飛定左既時候影ge！有出入境表、衛生檢疫表、飛機餐牌等~~(我最唔欣賞就係飛機餐~~搭咁多次國泰都唔arm我口味！)(我比較鍾意長榮、ANA、澳洲航空d飛機餐，好arm我胃口) 機上廣播資訊呀~~ haha~~又見到我隻手同部相機呀~~反光丫嘛~~機外陽光太猛~~ 搭左4個小時多，終於落地啦~~第一日，韓國的天氣比較凍，係-1至9度，而個天既顏色好特別，係水藍綠色既~~我好鍾意呢隻顏色，因為好特別！下圖係arm arm落左機既走道上面影ga！(注意：現在仁川機場現正進行擴建工程) 呢隻就係我地剛剛坐黎韓國既飛機啦~~已經落緊d行李啦！好快~~ 呢度係落機後的走廊~~ 歡迎到仁川機場~~隻公仔好得意呀！ 辦理完海關手續之後，我就去左拎返d行李，之後佢地仲要去換錢(因為係澳門換唔夠)~~換左錢之後，出左禁區，我地就先去information度問一問邊度有KTC (Korea Travel Card)~~搵左一輪，終於找到Shinhan Bank (新韓銀行) 既辦事處，咪入去問囉！點知佢地話呢間冇，有個好心職員就帶我地去左另一間，路途好遙遠ga~~之後終於到了，真係有得攪KTC，但係有兩種，一種係紅色(不能退款)，另一種就綠色(可以退款，但需多付按金20000won)，我地個個都係買200,000won~~加埋張卡2000won、再加按金20000won，總數就係222,000won啦！ 但係佢地d英文真係好唔掂，竟然連一d好淺既英文都唔明，只識單字，之後個職員叫左店長黎用英文講，太好啦~~終於有個識少少英文ga~~亦解釋左少少資料比我地，個個賣完哂自己張卡啦！Yeah~~ KTC試用後建議： - 不過我唔太建議大家用，雖然係方便，但除左機場銀行方面，其他地方好似都冇乜見過呢隻卡，就連自己銀行既市內分行都唔知。 - 另外d人英文好唔得，好難溝通，勁浪費時間囉！ - 再者你如果用唔哂d額，你都只可以退面額的20%，再加埋按金！(仲一定只可係機場既新韓銀行先有得退！)你話幾麻煩呢！ - 而且佢暫時唔可以當T-money (首爾八達通)，比舊版本功能更差囉！ 呢張就係KTC咭，另外就係我本Passport (我係葡國護照) ps.有好多香港人都唔知，澳門人用既葡國護照係真真正正的，唔係好似英國咁出d海外護照畀d香港人ga！即係話我地同葡國人jar住既護照係一d分別都冇！(呢個係唯一葡國比英國做得好既地方)所以去亞洲地方既時候成日d海關都會問問題，因為佢好奇怪點解d中國人用葡國本土既護照ga呢？ 之後就買左機場巴士既車票，我地搭既係602號機場巴士，去東大門綜合市場落車！(8000won)大約需時90分鐘左右先到東大門綜合市場，因為首爾市無時無刻都勁塞車囉！下圖就係車最後排影出去ga！ 拿~~我唔係跟團ga！(個個睇到呢張都話我跟團！)呢架係機場巴士黎ga~~各位！唔好攪錯！ 機場巴士 乘搭後建議：每一個站聽清楚下一個係乜站，因為佢d廣播係勁細聲，而且英文果段又唔係好清楚！最好睇住車上面個巴士站地圖，再估下佢講緊邊個站！(因為英文廣播係先講今個站，再講下一站)但巴士站地圖係架車既中間座位(上圖我左上位)，得一張咁大把囉！萬一過站或未到你就下車就慘啦！ 如各位住Western Co-op Residence 或者 Co-op Residence 都係搭602，係Dong Dan Mum Market站下車，前一個站係 JongNo 6街...

各位，讓大家久等了！我終於係韓國回來了，韓國現在滿街都秋葉片片，非常漂亮！ 我總共去了5天，在旅行期間我有check過blog，見到好多好多blog友同friends都留左言，所以忍不住回了一篇最新既blog文下的留言！其他的blog文留言，今天才有機會回應各位，真不好意思！ 剛剛執完行李，整理好戰利品呀！haha~~現在成檯一袋二袋手信，資料又一份二份，好似係房打仗咁囉！分緊手信比各位朋友啦！大家唔好急啦！ 至於相片方面，今次大約影左800多張，當中亦拍了影片，但由於本次屬於每機分工，所以我有一部分的相於其他團友的相機中，所以所有相片整理需時！預計最快12月頭，韓國遊記就可以同大家見面啦！(現在先睇埋日本既遊記先啦！) 今次去韓國，終於d野冇咁難食啦！(可能係我地揀合適大家的食肆掛！)因為我地5人當中，只有2人係食辣，但當中4個人都唔食泡菜，而且4個(包括我)極度恐懼那泡菜的味道，所以每餐的泡菜，就落在第5個人身上啦！ 韓食習慣方面，佢地首先係鍾意一人一份餐，並不喜歡share食，如果我地5個人，就一定要叫夠5份，個waiter先會走開，如果唔係佢會用好奇怪既眼神，而且返去同其他waiter竊竊私語囉！(因為我地試過一次)。另外就係佢地樣樣都有泡菜作為前菜，又唔鍾意人地食剩野，咁點算？我地既經驗係一定要清哂d主食，至於d泡菜就食得幾多得幾多囉！其實係韓國食野比日本仲要貴囉！小食基本由350w至2000w不等一客/枝(兌換價：1000won = 8.3 hkd)一份餐基本由5000w至13000w不等而快餐店的2人餐約15000至20000w不等當地人都幾鍾意食炸野，有好多炸雞店，10件炸雞需要15000w囉飲品大部分一罐700-900w佢比日本更麻煩，需要日本人都唔鍾意人地剩野，但唔會迫你有幾多人就叫幾多野囉！ 韓國溫度方面，而家大約係 -2 至 15 度 之間，每日不同！需留意韓國氣象局的預測，好準ga！話12-15點落雨，佢就真係落雨，其他時段都唔落雨，澳門氣象局要學下啦！唔好成日報d山埃報告先得ga！不過我日日都係3件衫，冇著厚褸囉！只係普通短袖tee + 一件長袖抓毛 + 一件普通褸 就出街ga啦！因為間間店舖都開暖氣，有時係熱到暈囉！ 韓國shopping方面，比想像中貴，它已經再不是購物天堂了，除了化妝品同護膚品外，其他東西都好貴囉！你可以去明洞衣類執到好平既野，亦可以去東大門的Doota講價買野(其他幾間都偏貴，而款式同doota差不多)，但其他既都幾貴下囉！買紫菜、泡菜、柚子茶、辣椒醬做手信就可以去南大門、首爾火車站的Lotte Mart。買Laneige化妝護膚品可以去梨泰院Laneige Outlet，佢有八折，而且有廣東話既服務員！ 韓國人及街道方面，佢地真係好熱情，你唔識路的話佢真係會帶你去，好多都好好人！至於街道呢，就好似返左大陸咁囉！真係好似，又有人吐痰~~(勁噁心x n)，連d地磚呀、巴士站都好似大陸廣州、拱北咁囉！同埋要找一個垃圾桶係好難ga！ 韓國交通方面，跟大陸簡直係一模一樣，見位就攝，冇車時又飛車過線，嚇到你半死，又唔多跟燈號！行人路jar電單車，仲唔會Bi你囉！你係唔會知道有電單車係你後面想撞你囉！首爾市係好塞車囉！不過一樣見車過車，一有位就攝！連機場巴士都係周圍攝！大家搭機場巴士出市區就要睇清楚同聽清楚下一站係乜，如果唔係好容易miss左落車ga！(因為佢地冇電子牌，亦冇中文英文顯示ga)要靠自己囉！ 韓國人語言方面，它們真係英文很差，比日本的更差，冇人識英文咁滯！我地都係有手指韓語書、手抄韓文、身體語言去溝通呀！相反，韓文就有d音同日文好似，所以我有d聽得明！ 韓國人樣方面，韓國d女性好多都係好村姑feel，男既就好農民feel，真係好係返左大陸咁！不過佢地連一個掃地阿嬸、執垃圾阿嬸都係會化妝ga！而有d後生仔係算好樣囉，但唔算靚，又唔算型！靚女簡直係萬中無一，如果有既應該都去左做明星，街上面都見唔到！ 好啦~~報告完畢！係時候要繼續分手信比人，同食紫菜啦~~ 編：阿乃

今日我0:00am就出左去get左d船飛先，點知去度碼頭服務部，佢話一定要get即班船，唔可以get其他班次！超cheap呀~~(成日d 0400船畀d黃牛黨get哂，一出去就已經要0600啦~~) 之後我咪走左去葡京既服務部get船飛，係！沒錯，佢係畀我get船飛，但每人限取3張！(o下！呢d乜規舉黎ga！點解只可以get3張，而唔係4張呀！一定都唔合邏輯~~) 最後我只get左3張，叫我阿爸再入去get1張~~真係麻煩ga~~不過係就係平少少，都唔駛咁既怪規則ga！ 唔比d衰野影響心情！小弟出走首爾啦，閒遊5日，大家5日後再見啦！ 我又係搭凌晨4點船，早上9點幾機！同上次去日本、新加坡係一樣的出發時間~~ 文：阿乃

---序---仲未寫哂d日本遊記又要出發啦！今次我唔係去日本，而係去韓國自助遊。冇錯，係去韓國自助遊呀！由於之前東x遊乜都未confirm我，所以我都未知去唔去得成，咪唔夠張揚住囉！結果星期五通知我要改早幾日先有得出發，要由19號凌晨出發，更改至17號早上出發先可以去！淡季真係差d，結果同行朋友一干人等都要請多一日假，可以成行啦！我地仲蝕左半日比佢tim~~   因為東x遊話，雖然我地係自悠行package，但我地都係已團體票方式出機票，如果你地揀果日唔夠人，就會將你地改早或押後至可以成行為止！(但佢之前冇講清楚！係人都以為係普通既自悠行ga啦！) 最後到今日，佢都仲唔肯叫我去get d房間入住單 同 其他資訊，我呢幾日已經勁打電話去問，佢就一直死拖話香港d資料未寄到囉！之前已經有同行者去鬧左佢一次，今日就到我去鬧佢。都唔知點做野ga，出發前一日都未有房單機票jar手，勁過份呀！之前佢話係澳門呢邊印d資料比我，我咪問佢同香港果邊d資料有乜唔同囉！佢話只係冇左d小錦囊，而d房單都一樣有效！嘩~~~~我咪立即%(^$^_佢，有冇攪錯，咁點解唔一早係澳門出比我，等乜鬼香港呀！係咪出發前都收唔到我都要繼續等到個旅程過左，我都去唔到先？？？ 我有好多friends話，澳門東x遊d旅行團就好好service，完全冇問題。但package同出機票果個部門，10個有9個顧客都勁嬲，成日拖都唔知拖乜？貼錢買難受，仲要成肚氣！下次我都係去返康x同x華呢兩間好過~~ 不過就好攪笑囉！變左搭CX(國泰機)，唔係搭KE(大韓機)！真係一波三折才可以出發，希望今次旅程順順利利，返來寫返D詳盡既遊記比大家睇呀！   ---行程安排---DAY 1   2006‧11‧17澳門--> 香港--> 韓國仁川機場 -->東大門(酒店) -->明洞(明洞聖堂、南山公園、首爾塔) DAY 2   2006‧11‧18忠武站(南山韓屋村) --> 安國站(宗廟、昌德宮、仁寺洞) --> 梨泰院 --> 夜遊東大門 DAY 3   2006‧11‧19景福宮站(景福宮、國立民俗博物館、慶會樓) --> 松內站(Aiinns小人國世界) --> 惠化 -->明洞 DAY 4   2006‧11‧20會賢站(崇禮門)--> 大公園站(首爾樂園) --> 梨大 --> 夜遊東大門 DAY 5   2006‧11‧21市政廳站(德壽宮、石牆街、現代美術館、貞洞教堂)-->...

早前太多工作不如意，所以決定離開那個是非地，已經休息左一會！於早前同友人商量，決定冬遊韓國，感受秋冬氣氛。而且我去過咁多地方，從未試過係淡季(即10,11月)去旅行！   今次選擇出走首爾，踏足呢個分別於10年前、及6年前到訪過的國家，未知今次d野係咪仲係咁難食，樣樣都食唔到，最後要返酒店食杯面呢？(希望唔會啦！) 已經plan好哂d行程，大家亦確認了行程，應該唔會再有大改動啦！好多謝朋友咁信得過我，又係交哂d 行程安排、訂票訂房、計價、旅遊保、船票、機鐵等畀我處理，大家出來開下會dissus左四次就可以完成！算係比較快GA啦！因為此終人多，意見就多，要組合一個滿足哂各人需要的行程不容易啦！ 除左行程安排及預算案，當然唔少得，今次又係由我充當領隊兼導遊啦！但我唔識韓文，所以一定要去之前搜集好哂d資料，唔識去的話，就大家齊齊問路啦！增加左旅程的挑戰性同冒險性~~好期待呀！ 由於朋友們都未試過自助遊，所以要同佢地做多d心理建設，講多d注意事項，等佢地冇咁驚！ (待續：序2 - 行程安排及預算)文：阿乃