澳門人講飲講食

026 澳門人講飲講食：小上海鍋貼 這家店對每個澳門人來說並不陌生，亦可以說幾乎每個澳門人都幫襯過ga啦！位於賣草地外賣小泉居隔離既巷仔內，以傳統方法製作的鍋貼、生煎包！   其實唔係間間上海菜有生煎包賣ga！而且這間店，每次都有大批人係度等新鮮既生煎包、鍋貼、煎餃子出爐，佢仲要係o係你面前煎，保證係最新鮮~~ 以前自由行未開放既時候，澳門都唔算繁榮既年代，我地已經要排長龍買佢既上海食品，而家可能係更誇張tim呀！ 講返先，佢每個賣的價錢由 1蚊至2蚊澳門幣不等，超級平平平~~好多時d人都一買就十幾，廿幾隻咁買ga！所以有時你排到好前，都未必有你份，可能都要等下一輪出爐呀！ 佢最出名既都係得三樣野，包括：鍋貼、煎餃子、生煎包 好味程度達：8.8分ga~~ 希望下次再次來澳門，又多一個小食店，可以買野食啦！雖然我都知，好多雜誌、書藉都介紹過，但在此我都要再介紹好一次，因為我成日都食ga~~真係好唔錯，又平既上海小食呀！ 編/攝：阿乃

025 澳門人講飲講食：禮記鮮果(果汁撈) 我今次講既唔係荷蘭園既 禮記雪糕，係另外一間完全不相關的店，叫 "禮記鮮果"，呢間店以前係o係現在賣草地的Bossini位置，因為當時要拆，以及重新裝修而被迫結業了！ 當時係2005年左右，自由行都已經開放，禮記鮮果的生意滔滔，人流不斷，但好可惜被迫結業！但昨天經過賣草地，發現它終於找到鋪位，並重新出發，再度開張，而且店舖被以前更加清潔，更加燈火通明，仲有就係跟以前的位置只有數步之隔！   講左咁耐，大家都可以唔知係邊，其實就係各位由議事亭上大三巴的必經之路！入草堆街就要係議事亭既bodyshop往左上三大巴這一路後，此路後有台北小泉居外賣部、Roxy新開的專門店、裕興隆廣場、新Bossini、CK underwear專門店、大聲公涼茶、女媧廟等！ 而 "新既禮記鮮果" 鋪位就係昔日紅豆餅果個位度！看看下圖~~ 以後經過，大家就可以繼續賣生果撈來食啦！係最出名既有三款生果撈，分別是：1. 芒果汁生果撈  (9分)2. 蜜瓜汁生果撈  (8.8分)3. 西瓜汁生果撈  (7分)分數純粹個人喜好！ 它的特別就是生果勁多，果汁比其他店舖較少，咁先抵食，一杯已經好飽，每杯都係十幾廿蚊之嘛！(我唔知而家重開有冇貴到呀！但一定就係因應唔同的果汁底，會有唔同的價錢！) 另外，如果你唔想食杯中某類生果，仲可以一早同佢講，佢會幫你換其他生果！例如我唔食木瓜同火龍果，佢就會幫我換成蘋果 & 楊桃，非常好人呀！價錢不變~~hehe 以後大家係附近就可以買一杯來食，之後去我之前介紹過的大堂巷食魚蛋，又或者去國華食雞蛋仔、夾餅都得！ 編/攝：阿乃

024 澳門人講飲講食：好麵膳(麵食茶餐廳類) 今次同大家介紹的是一間平時久唔久都會去食既麵食館，佢個名好得意ga，叫做 "好麵膳"。   大家可以乘搭任何一輛途經水坑尾M記巴士站 / 對面水坑尾公共行政大樓巴士站 的巴士，於該站下車，沿馬利奧斜巷上就是了！步行約1分鐘內~~(由於水坑尾係大站，所以好多車都到ga！) 呢間好麵膳，我最鍾意食係既潮州白魚蛋 以及 豬頸肉，所以今次就食了潮州白魚蛋豬頸肉湯面(mop$19)，由於今日冇套餐，所以要散叫，就貴左少少囉！ 看下圖就是我碗麵既樣子啦！ 有時佢d豬頸肉好林，有時就好韌囉！不過算係好唔錯，因為佢好多ga~~係個麵煮得arm arm好，而且唔會韌，亦唔會太林囉~ 不過佢位既就唔係好多，得7張檯，又係一到中午食飯時間就多數都冇位！星期六、日都係一檯剛走，又立即又有人坐ga啦！ 如果大家食得特色野太多，呢間算唔錯既選擇，仲有係正中區，有時大家買野買到累都可以去試試！而且佢d野凍飲係 mop$8.5 - 10，熱飲都係 mop$5-7，勁抵啦~~仲要好大杯，又唔多冰，絕對唔扼你囉！ 我成日介紹d澳門食店，梗係激死alvin、keith同阿當佢地~~因為我近期介紹既，都冇帶佢地去食過！haha~~(其實你地都食唔切咁多野啦~~得30個鐘~~係咪？) 編/攝：阿乃

023 澳門人講飲講食：生利咖啡美食 這間位於南灣區瑪嘉烈餅店隔離的舊式茶餐廳，係澳門屹立了多個寒暑，直到現在還保持住一貫作風、一貫裝潢、一貫味道，亦一直都具備人氣的茶餐廳。 大家可以乘搭新福利巴士(因為我唔識澳巴)：2、3、4、5、6、7、8、9、9a、28b、28bx、32、33 於葡文學校側站 或 殷皇子四世大馬路(即澳門廣場)站下車 或 相反方向的南灣時代商業中心站，步行30秒左右即可，至南灣CTM後街的所在地。 這裡出名d乜？佢出名既有3樣野~~ 1. 炸魚片 (美味指數達：9.5分)     為何炸魚片都出名呢？道道都有ga啦~~     沒錯，但呢度就係非一般炸魚片。你可以想像得到魚片可以炸到蝦片咁大，而且好似蝦片咁脆，一d都唔覺得食緊魚片，但又有陣陣魚味呢？哈哈~~     跟阿乃介紹既去食就冇錯啦！信我啦~~我成日都去幫襯ga！不過炸魚片就會有時未炸透，會有dd煙韌囉！不過就好唔錯ga！ 2. 牛腩面 (美味指數：8.5分)      d牛腩好林，好入味，好似食牛肉咁。如果食得辣既朋友可以加勁辣，我呢就唔食得辣，所以我只叫一碟辣分開上，自己加落去，認為夠自己的程度就好了！ 3. 豬扒包 (美味指數：8分)      佢既豬扒包雖然就冇乜特別，但勝在入味同超林，好似入口即溶咁既feel，我估當然佢鬆肉粉應該落唔少，但你咪理，人地就係林過哂出面d豬扒呀~~又食你唔死，有乜所謂！ 最後我要介紹我平時食開既 "煎魚片河"，其實是同樣好食，d煎魚片同出面整既有d唔同，唔知點解係特別香，同滑ga！有相睇呀(下面) mop$11 而呢個係同行者食的炸魚片香腸通粉！ (mop $14) 呢碟就係分開上的咖哩辣啦！(免費任落) 另外我要同大家講一聲，落單既時候你一定要講清楚你要既係 "炸魚片"、"煎魚片"、"汆魚片"(用滾水錄熟)，因為三種都唔同。而只有炸/煎魚片可以單當小食叫，其他都要跟面ga！大家可以看看價錢就有乜野食，真係好經濟ga~~ 這是店內環境呀~~如果撞正食飯時間的話，就一定會冇位，連有位坐低既，等食物來都等好耐ga~~平常下午茶時間就好快，幾分鐘就出ga啦D野食！(當然六、日就好多時就爆滿ga) 要做個識遊澳門既人，唔再停留大利同葡京，懂得捐窿捐罅做潮人，睇澳門人講飲講食啦！ PS.佢地嘩鬼三人組可能比我激死，又冇帶佢地黎呢度食野！ 編/攝：阿乃

2006.09.13  下大雨、大塞車 & 三號風球除下之夜晚 三隻嘩鬼星期一走左之後，我、雯雯、魚魚、Amy 臨時即興去了札幌日式火鍋打邊爐~~我地都唔係第一次來ga啦！今次就決定左一人一爐，坐吧檯啦~~   我首先揀選了豬骨湯底 (mop $ 6)，雯雯 & 魚魚都係選擇了沙爹湯底 (mop $ 6)而amy最後都係揀左同我一樣既豬骨湯底。 至於日式火鍋我地食左d乜？唔好咁心急住~~你睇下餐牌先啦~~有好多唔同既餐，我地係一人叫一個餐ga~~ 雯雯 同 魚魚就揀了 海鮮配豬肉 & 海鮮配羊肉鍋  (每個為 mop$68)amy就揀左 海鮮雞肉涮鍋 (mop$68)而我呢就揀左澳洲羊肉涮鍋 (mop$42)，看下圖看看我的羊肉鍋有幾多野先！ 已經急不及待開給食啦~~haha~~唔等amy lu~~ 我係可以一個人食哂成份餐，之後仲食埋amy 1/3碟雞肉tim~~haha~~我都嚇親自己，竟然食左咁多野tim~~而且又唔係好貴之嘛！其實呢間d野食都幾唔錯，好有水準ga！不過就比其他店貴左d囉！食物分數：8.8分我就提議下次去內港灣，因為平好多，而且都好好食ga~~我去左幾次ga啦~~haha~~ 我地係食既途中都有叫野飲，我地三個都叫了coke~~而amy就叫了波子汽水，我地一齊來看看amy的雞手鴨腳開汽水，仲攪到我個位濕哂！因為我驚佢支汽水噴我，所以手震得好犀利呀！ 鬼影變幻手呀！好驚呀~~ 我地又有影合照ga~~ 都影得唔錯ga~~haha~~(photo by 魚魚)(photo by amy) 如果未去過，大家都可以試下 下次去呢邊野，平均消費約60元左右啦！由於係自己打邊爐，梗係味道唔差啦~~hehe~~ 編/攝：阿乃

021 澳門人講飲講食：皇朝上行咖啡 9月3日(星期日)同班friends去完打保齡之後就去左位於皇朝區呢間上行咖啡度high tea兼晚飯，因為我地去到都已經6:00pm，而且有兩位朋友一陣要去文化中心睇Theatre sport比賽，所以我地就草草咁食囉！下次先慢慢品嘗吧！ 地址：澳門皇朝區 倫敦街84號 環宇豪庭地下 Y 舖電話：750 688營業時間：10:00am - 11:00pm人均消費：about mop$35 - 80 (視乎high tea 定 午.晚餐)交通：8、12、17、AP1 (文化中心站下車步行3 min)，            1A、23 (成昌巴士站、建興龍DHL巴士站步行約3 min) 講完d資訊之後呢，帶大家看看店內外環境啦！ 這條就是倫敦街啦，相中最遠的有個角突出來的就是文化中心，有好多廣告牌呢間就係環宇豪庭啦！ 上行咖啡就係咁既門面，相信大家去到附近就好容易搵到ga啦！它樓高兩層~~ 店內採用葡歐cafe的風格，大門口旁有個玻璃飾櫃，牆上滿放了不同的西洋人物、映畫等的黑白相片，洋溢著懷舊及歐陸式風格。 店內的燈飾亦採用懷舊的燈種，吧台及開放式廚房，非常整潔！座位亦非常之舒適~~ 牆上時有裝飾壁燈，帶有新古典時代的感覺，仿如置身歐洲的coffee shop內的感覺。為了營造氣氛，還特意在消防喉、假天花處放上草葉，在其不完美的位置上作修飾。 通往樓上雅座的通道~~ 這是Lyrical Cafe的店內粉筆店名牌~~ 這是朋友的set sandwish的凍檸茶這是朋友的吞拿魚牛角飽~~味道不錯，中規中矩，有7分這是另一位朋友的煙三文魚牛角飽~~味道好好，個飽好脆，亦好唔同出面一般的牛角飽，未食淨聞就已經好香啦~~味道評分：8.7分 這就是那個set sandwish啦，45元正澳門幣。 這是本人的蘋果紅茶，它選用了英國的紅茶品牌茶包呀，未飲淨係個味就已經好香蘋果味，亦附有楓蜜糖。味道清優，飲落有陣陣的茶香，亦有楓糖的味道，建議要落蜜糖飲用會好味d！一壺可以飲到2杯左右。味道評分：9分。價格：18元澳門幣(尚算ok的價格，比小泉居仲平少少) 呢個係另一個friends既凍咖啡，味道佢話好得，我就唔知啦~~冇試過~~旁有一個set meal，我最想試就係no.2忌廉焗馬介休餐。68元澳門幣，有是日餐湯 + 沙律一客 + 主菜 + 白飯/意粉/薯角...

020 澳門人講飲講食：台灣帝鈞炭烤胡椒餅 澳門近日新開了一間台灣過江龍加盟店，只售賣一種小食，就是台灣最出名的小食之一----胡椒餅。這店位於永樂戲院對面條巷，近日都見排長龍的情況才買到來食！(現在已搬到中區，賣草地繼續經營)   我係開業第二天去買既時候，已經係晚上8點左右都仲要排隊買，佢當時做緊試業，賣哂報紙做三日特價，每個8蚊！咁我果日去睇死亡筆記，順路梗係去買來試試啦！ 試玩結果：佢就唔係好辣，我都頂得住！肉質口感不錯，餅厚肉多！唯獨有D外皮烤焦了！都有肉汁，不過唔多，8蚊一個都算貴，不過可以接受。味道一般，普通一個餡餅似的！ 試食分數： 7分(因為唔係好驚喜的味道) 據今日的澳門日報報導，澳門這間海外唯一分店，日售2000個，每日大排長龍tim~朋友雯雯都有相關介紹呀：http://hk.myblog.yahoo.com/jw!MJeZi1WWGRse30vAnaB0XLU-/article?mid=490 有食過既朋友，可以寫下你的試食後感嗎？ ps.順帶一提，除台灣之外，海外分店暫只有澳門這一家，香港都未有！所以大家過來澳門可以去試試，唔駛過台灣lu~ 編/攝：阿乃

019 澳門人講飲講食：西灣安記   它是一間老字號茶餐廳，佢最出名既係豬扒包。大家唔好以為taipa的大利豬扒包先係澳門豬扒包，呢間都係澳門豬扒包既俵俵者！ 我最鍾意食佢d豬扒系列，包括：1. 炸豬扒干撈意  18蚊2. 豬扒包 / 多 (一定係炸ga)  8蚊3. 炸豬扒燴意  18蚊 除左豬扒系列之外，仲有好多選擇，佢粥粉面飯、腸粉、包乜都有。仲有d好攪笑既包，如駱駝肉包......不過本人就未試過啦！ 佢既老鋪位於南灣既燒灰爐巴士站，可乘搭新福利6、9、9A、28B到達。仲有其他分店，包括位於：(中區)板樟堂 大堂巷聖安娜隔離(松山)何東中葡小學 對面(新口岸)中華廠商會大廈隔離好似仲有分店ga，不過唔係好記得啦~~ Tips：澳門馳名中外的澳門豬扒包賣點大解扣大利豬扒包  係  自製炭烤包為賣點，而唔係塊豬扒，而且佢豬扒有骨。西灣安記豬扒包  係   塊豬扒為賣點，它是用天婦羅的方式去炸豬扒，而且冇骨。葉熾記豬扒包  係  澳門首間發明豬扒包的食店，簡單來說就是澳門第一豬扒包，澳門豬扒包發源店。 咁大家可以按需要去食屬於澳門的豬扒包啦！ps.除大利外，另外的都唔駛排隊~ 其他澳門blog友可以幫我補充ga，又或者你的意見！我知道應該冇人未食過呢三間既豬扒包！(本人就最唔like大利，因為有骨，一不留神就咬到牙痛)thanks~~ 編/攝：阿乃

018 澳門人講飲講食：忙裡偷閒 它是一間位於皇朝區酒吧街的一間台式飲品館，以Mickey Mouse為主題的食店！我成日都鍾意去呢間店，原因係我鍾意食佢既招牌小火鍋。   這個小火鍋只需40幾蚊，有麻辣 / 豬骨湯底，仲有佢地獨創的 "奶茶湯底"，不過本人覺得個奶茶湯底唔係太好囉~~呢個小火鍋一,二人用就arm arm好！ 除左小火鍋之外，我仲鍾意佢地既其他小食：1. 棺材板 (忌廉海鮮餡) 10幾蚊2. 炸芝士狗 (即芝士釀入獅子狗內)  18蚊3. 炸蝦餅  18蚊4. 炸魷魚鬚  18蚊 仲有佢地d飲品呀：1. 芒果綠茶 / 荔枝綠茶 + 彩色笱篛2. 芒果沙冰仲有d自創既飲品......不能盡錄 食品都幾唔錯ga！不過飲品就太甜，次次都要少甜或者叫佢另外比一杯冰加落去！如果去的話，人數就唔好太多，因為d檯比較細，而且好難拍到檯！最大果張檯係6個人！ 係既環境好好，全部都係米奇老鼠既擺設同裝飾，連d碗、盤、碟、檯布等都係米奇！如果你好似我成日來咁，老闆就有折扣優惠卡比你，仲有得儲印花換米奇既精品ga~~ 現已經遷往高士德區呀！ 編/攝：阿乃(由於是由手機拍攝，質素比較差！)

今日為大家介紹的是皇朝區的葡萄園餐廳。這間餐廳逢週未及假期最好就book定位先啦！內部環境及格調都非常好，就此亦拍了數張給大家看看！ 價格方面就偏貴，而味道方面就很不錯呀！ 今次我地美食團又再出動啦！本次有四個人一同前往，我地叫了以下的項目：1.黑椒牛扒2.忌廉薯絲焗馬介休3.忌廉芝士燴意粉4.有汽提子汁x1、有汽蘋果汁x25.鮮檸雜飲 最後位位85元付款！我最欣賞就係忌廉薯絲焗馬介休，我好耐冇食過啦~~非常好食~~第二位就係黑椒牛扒，需說是6成熟，但其實都已經係9成熟，所以我會食，而且我覺得好好食！第三位就梗係個意粉啦！因為冇乜驚喜，大部分食店都一樣ga啦！(因為我鐘意食忌廉、芝士呢d，所以今餐我都好滿意呀！) 美食評分：89分 (美中不足係價錢稍貴，唔可以成日都黎食囉！) (仲有一部分相係 "相簿" --> "澳門食店" )編/攝：阿乃

望廈區的小泉居，是一間格調與其他的小泉居不同，而且長時間滿客的。價格與其他小泉居係一樣。 到達方式：任一交通工具，於望廈體育館 或 新益花園 下車即可。 現在就看看內部環境吧！這是二樓玄關的盤景藝術。   這是以日式或中式涼亭設計的雅座，可坐四至六人。 我去這店至愛的窗邊舒適大梳化，好舒服ga！比樓上的木椅好坐，所以好多人都鍾意坐，以及等有人走時再轉到這些位置！ 這是我點的冰水果茶，不過比我食哂d生果，同埋飲到所剩冇幾先影相~~ 我其實都幾鍾意去呢度hea~~真係個feel好好，而且餐飲都唔貴，又易泊位左，所以都係一個不錯的hea站！而且呢度做占卜真係一流ga~~不論氣氛與格局！編/攝：阿乃

濠食新煮意Food Idea為澳門一互聯網綜合飲食指南，目的是為公眾提供全面的飲食資訊。資料庫現時擁有澳門過千間餐廳資料，並且會不斷更新，務求將全澳食肆資料納入其中。 這是從Blog友 Mel 引用過來的，如果各位想知多d，想了解多d，可以用下面的引用link，linking去她的blog度看看呀！ http://www.foodidea.net/ 我亦希望大家blog友，下次來到澳門會找到更多好食好玩的地方，所以我會一直為大家提供澳門的食肆、好玩、休閒拍照等地方！期望各位一直多多支持啦！ 阿乃

015 澳門人講飲講食：日刺北海道美食館 (美食廣場類) 位於漁人碼頭的東西匯聚內其中一楝建築物，這楝建築物有三間日本食店，一間(地下中堂)係sale新鮮魚生及壽司，一間係(地下內堂)日本北海道美食館，仲有一間係2樓吃一d高檔d既日本美食。 我今日同大家講的是位於地下內堂的 "日本北海道美食館"，它是一個日本美食廣場，有飲品店，及四檔日本美食(包括：炸物及小食、便當定食、中華料理及丼飯、烏冬及拉面)。 我們今晚三人行到了試吃，買既野食雲集四個檔的，大家可以看看下圖：(首先是我們全部叫的食物及飲品，每位約70元就可以埋單，是檯面上所有的呀！) 食物清單如下：(共mop$223)(1)一set滑蛋吉列豬扒飯連烏冬+酸菜 mop$40(2)一set炸天婦羅飯連烏冬+酸菜 mop$48(3)一set辣蝦定食 連麵豉湯 mop $45(4)兩客牛肉漢堡薯餅 mop$30(5)一客日式炸雞件 mop$15(6)兩杯鮮檸特飲 + 一杯鮮橙特飲 mop$45 我地先講講份量，一set基本上已經夠哂飽，只不過我地第一次入來試，諗住試多d品種，試試個質素ok唔ok，而且我地又影相，d服務員仲以為我地係飲食專欄記者tim~~我叫我是(1)號，基本上非常美味，豬扒有口感而不太韌，幾好食，飯當然用珍珠米啦！至於個素烏冬d味都非常好，而且我like食面、烏冬多過食飯呀！haha~~ 小食方面呢，先講牛肉薯餅，這個就真係推薦大家去食，唔會太滯，炸著蓉餅中間夾了粒粒牛肉碎，口感一流，味道唔會太鹹，真係唔錯，而且又附了一個唔知乜醬，但係大家都冇點，可能醬既味道不太好！可改善的地方是著餅皮可以再脆一點就真係一絕啦！ 雞件方面，表現一般，賣相亦一般，味道偏鹹，所以要飲多d水，一一般般的水準，但就唔會有骨，剩係有肉姐！ 飲品方面都不俗，我叫的是鮮檸特飲，其實是一杯青檸梳打+少少雪碧，酸酸地又帶少少甜，都幾唔錯呀！15蚊一大杯，都裝得幾滿，唔錯！至於另一個friends就叫了鮮橙特飲，是一杯橙味soda，同我地果d差唔多，不過有樣好笑的是，佢塊橙剛剛就隻杯咁大，好惹笑！ 總括來說都幾ok，不論賣相、座位、環境及味道方面。今餐我畀85分，唔知其他兩位試完有什麼評價呢？如想看多d相，請到相簿-->澳門食肆，謝謝！ 如果要看其他兩位同行者的評價可到下列topic：魚魚Cafe：又到星期六，你有乜節目？雯雯~~豬：北海道美食館......

014 澳門人講飲講食：東望洋餅店 (西式糕點類) 位於皇朝區成昌後面，它是一間Coffee shop + 西式餅店。價錢公道，比一般的coffee shop平少少，格調好潮，帶有葡國式的擺設，不俗呀！我成日都會買迷你芝士批(5蚊3個)，仲有芝士軟包(5蚊個)。但次次都趕時間，一係就食左野，所以未坐低飲野呀！我d friends話好好，味道ok！ (下圖是店內座位區及擺設) (下圖是由門口影入去，是否很不錯呢？左面冇影度的是面包區) (下圖是服務台，下方沒有影的是西餅急凍櫃) 由於佢唔比人地影佢地D西餅及面包(可能驚人抄野，及對方來check價掛)，而我亦先徵求佢地既同意，佢先比我影幾張相！ 講返佢d面包，其實會比聖安娜貴少少，西餅就比金滿堂平。佢重有曲奇餅同生日蛋糕訂造等，基本來說都是一間不俗的店，每逢中午、傍晚都好多OL、辦公室人員去買野食，而六、日就多d去hea既人。 交通方法：巴士 1A、8、17、23都可到達皇朝區，在成昌附近巴士站下車即可。步行至餅店約半分鐘。(皇朝區由於好多香港人都唔識去，所以建議大家看一看澳門地圖做少少資料搜查，再唔係上到車問司機。)(因為皇朝算係澳門的飲食集中營，什麼菜都可以用皇朝區找到) ------------------------------------------------------------------------------------------Update ：2006-06-11 9:40pm  (新加入下列兩幅新相) 下圖是堂食區的舊澳門相片牆壁，多了一份緬懷澳門的格調！ 這是由堂食區影去counter，有少少手震tim~~ 仲有一張係堂食餐牌，大家可以去 "相簿--->澳門食肆" 度找一找，不便貼人地d價目出來！ 編/攝：阿乃

013 澳門人講飲講食：銀禧粥店 (粥品麵食類) 這間又是伴隨澳門中區成長的老牌粥店之一，現在比而前貴了好多，但仍然咁好食。位於白馬行的Inshoe's Net對面，由議事亭一直向bodyshop行，到bodyshop後再直行到g2000 & u2後，再直行就到。 銀禧粥店再直行就是國華、信達城、天神巷啦！ 它的粥品、湯麵都很不錯，唯獨比較貴，要成14蚊一碗，比起黃枝記平，但比起盛記就貴左一倍呀！當然盛記沒有麵食，粥亦只有皮蛋瘦、白粥兩款啦。 大家行到肚餓，但又唔想吃小食、甜品，想清清地，除了新馬路果邊的盛記白粥，噴水池那間貴到嚇死人仲要排隊的黃枝記，還有一間銀禧呀！ (都係未有影相，遲d補貼返啦！)編：阿乃

012 澳門人講飲講食：國華小食集中地 (街頭小吃類) 位於白馬行國華戲院地下，是現在中區的小食集中地。 有很多很多野吃，包括：韓國烤魷魚、夾餅雞蛋仔(跟009所講的同一老闆)、魚蛋小食(是009所講的老闆開的)、台灣可樂餅、各式果汁、鮮果撈......都有。 每逢放學、假期、節日，那裡絕對係人山人海，真係針都插唔入呀！而且價格都係好平，從幾蚊到十幾蚊左右。果汁大大杯；鮮果撈就生果滿一杯，果汁少。 各位如果過來澳門，除了懂得去我以前講的大堂巷、大堂街、議事亭之外，還是懂得行白馬行呀！白馬行就是議事亭尾的U2、G2000之後的行車路，這條白馬行可以一直通去水坑尾，荷蘭園波鞋街。身為精明的你絕對要識呀，可以慳返搭的士的錢，而且又好快到荷蘭園呀。 參考時間：(由議事亭、板樟堂的U2,G2000出發)回新馬路     步行2分鐘到草堆街     步行30秒到大三巴     步行2分鐘到大堂         步行1分鐘到國華         步行2分鐘到水坑尾     步行4分鐘到荷蘭園     步行6分鐘 (未有時間去影相呀！遲d補貼啦！)編：阿乃

上星期同友人一齊去漁人碼頭的阿拉拍商場內一間小食肆high tea(其實一早有預謀去果間野食ga)。 為什麼？就是為了想試試它的麵包湯。 上次食麵包湯係3年前，係tapia的大台北食，它的麵包湯非常唔掂，點解我咁講呢？雖然佢d湯都好好味，但食麵包湯，當然係食埋麵包啦，對不對？但大台北的那個裝湯的農夫包，簡直同石頭冇分別，我叫waiter比一把切扒的刀我，我都切唔到，個包仲絲毫不損，用左1個鐘先切到小小來食，你話幾恐佈呢，所以我以後都唔食佢d麵包湯。 今次都係想試試在漁人碼頭新開那間我麵包湯得唔得。當日下午4點左右，我們到了漁人碼頭啦，泊左車就去那檔食肆(我冇留意佢個名)，之後每人order左1個麵包湯，另叫1客薯條share，之後仲每人叫了1杯檸樂tim，位位$48蚊埋單，都可以接受。 講返個湯，湯呢就淡左少少，都ok夠杰，如果杰少少更好，因為係周打魚湯。再黎講個包，包一樣選有農夫包，但包非常鬆軟，好好味，飲到一半之後，絕對沒有難道就可以用手撕d面包浸湯食，不像大台北那個 "硬石頭" 用刀都切唔到囉！非常不錯的一個High Tea呀！唔好睇相好似冇乜湯，其實佢都幾深，而且中間又闊，都裝到幾多湯呀！這個湯28元，薯條一客15元，檸樂要15元(比較貴)。so可以接受的價錢~~ 至於薯條也是挺不錯的波浪薯條，不過不失。檸樂呢，檸檬都幾多，但冰也不少。haha~~如果大家下次去開漁人碼頭，不妨去試一試！佢係收晚上7點ga~~所以中午至下午去就最fit啦~~坐位方面分有店舖內，跟露台海景檯。店舖內有少許冷氣及LCD播放演唱會，露台就冇冷氣同冇LCD，你們自己考慮位置吧！ 它是位於一間賣參茸的店舖(好似叫東方紅)隔離，記住係阿拉伯商場內，不是羅馬鬥獸場的正官莊隔離呀呀！ ------------------------------------------------------------------------------------------------編/攝：阿乃

011 澳門人講飲講食：法跡三文治專門店 (輕食類) 位於賣草地菓子天地隔壁，金錢餅主鋪對面。由澳門本地人自行創立的法式面飽咖啡館，好似starbucks、supersandwish、angel咁，不過就平好多。 它原來是我一個朋友的阿哥同朋友一齊開的，所以都要係度幫下手做下宣傳先！開店時澳門日報曾連續幾日都有報導、專訪咁樣呀！ 它的招牌：牛魔王芝士煙牛肉飽 $22非常好食，我都食過幾次，而且個飽超大，如食飯的話一個剛剛好，女士的話可能要2個人Share，下午茶都要啦！ 另外可配d咖啡，是日餐湯，或者我至愛的檸檬梳打，都係10多元，非常抵吃抵飲！但內部佈局通常只供4人、2人為主，因為地方有限，而且以2、4人檯為主。除了飽之內，還有意粉同飯供大家選擇，上次食左個墨魚汁意粉，都好好食！ 如果講漏野or有野補充的話，stella你回應啦~~可以宣傳下嘛！同時澳門第一間無煙食肆呀！(我冇收宣傳費ga，真係覺得好才推介比大家！)(相用手機影，所以比較差，希望唔好見怪。) 編/攝：阿乃

010 澳門人講飲講食：金錢餅 (小食類) 位於議事亭前地的仁慈堂門口，有一檔由細細個就食開的小食車仔，只賣一種食品，就是金錢餅。其實佢有一間主鋪頭，位於賣草地的"菓子天地"對面。 它們都是用最古老的紙皮盒裝的，澳門現在冇乜邊間有呢d懷舊盒啦！復活節假期時帶D香港朋友飲飲食食時，經過影左張相比大家睇下。當日非常多香港人排隊買食，而主鋪更話唔賣啦~~佢而家做果D人地訂哂ga，冇現成的賣比人，叫大家去返仁慈堂度排隊買啦！ 你話佢厲唔厲害呢？好生意到唔接添呀！ 編/攝：阿乃

009 澳門人講飲講食：全城出名雞蛋仔(街頭小吃) 今日同大家講埋大堂斜巷一檔同阿爸傳到去個女既流動小販檔，又係好耐歷史ga啦，我細細個食到而家，每逢放工放學、星期六日、公眾假期佢都係非常多人買ga，而且平常都有好多市民都專登駕車來買。 上圖中你地都見到你幾個人買緊or等緊。今日影相既時候，見到阿爸同阿女都一齊係度，大家認住佢地個嘜頭啦！只此一家呀！位置就係之前007,008所講的同一位置，只不過係金滿堂、暹邏對面時代停車場入口處。 佢算係澳門最出名的街販雞蛋仔夾餅檔，佢只有三樣野賣：1.雞蛋仔2.香蕉糕3.夾餅 點解咁好食？因為佢地d蛋漿係自己每日調配，日日新鮮，賣哂就收檔ga啦！我都有係澳門其他地方吃過，一係就顏色唔靚，味道又淡，一係就整得太難食。香港都有食過旺角灣仔d檔口，當然就更.....難吃啦(我絕冇踩香港雞蛋仔的意思，各位唔好誤會，而不過我覺得香港d雞蛋仔一早整定哂，食既時候凍冰冰又硬卜卜，雖然味多，但此終原味及熱呼呼時食最好！) 而我最鍾意食佢既夾餅，唔係雞蛋仔，因為佢既夾餅唔知點解會咁好食，自己都整唔到佢個味，其他檔又學唔到，而且都有好多人去買夾餅為主tim。有次我買緊既時候，有個阿叔走埋黎話要買10份夾餅tim，其實一d都唔出奇，因為成日有人都係咁賣返屋企食，當下午茶。 價格方面好係4蚊澳門幣一份夾餅，雞蛋仔好似係6蚊一排，香蕉糕就唔記得啦！ 下圖就是大堂斜巷，見唔見有個禁止符號既牌呀！沿住呢條行人道一直行落下，你就立即見到啦！如果都係唔識去的話就問下人啦！ (下一回我地返去議事亭前地同賣草地！ 010：澳門人講飲講食 )編/攝：阿乃

008 澳門人講飲講食：暹邏小館 (泰緬式美食類) 還記得上一期的金滿堂嗎？其實今日介紹的 "暹邏小館" 就係金滿堂隔離。"暹邏"，音讀 僣羅，僣建個僣的讀音。 其實佢已經好耐歷史，我細細個就已經食佢d野，好好味！年前佢重新裝修過門面，所以好似好新咁，唔知係咪裝修左既關係，佢d野貴左好多，平均叫個緬甸面+特色飲料就已經30幾蚊。 中午去的話可能會冇位ga，因為好多人都會去食，附近商廈都好多，而且佢開到晚上十一點(冇記錯既話)，吃宵夜都可以呀！ 阿乃推介：碎肉魚蛋粉、泰式炭燒豬頸肉、三色冰、青檸冰、雞絲撈生面、富貴魚等泰緬餐館招牌！泰式炭燒豬頸肉就30幾蚊一大碟，兩人share就差唔多，絕對可以與香港d高級餐館70幾蚊得十幾塊既比，色香味都俱全。而雞絲撈生面呢，香港人可能唔知係乜野，但澳門有好多泰緬店都有供應，"生面"口感好彈牙好Q，幼身似電左曲髮既幼面咁。我喜愛青檸冰，酸酸地，又好冰涼，開下胃，非常不俗的飲料！ 其他仲有其他好多好多，不過我都未試哂，還有就是我比較揀食，所以有些海產及一些蔬果我都唔食，唯有靠其他澳門blog友幫手就補充啦！ (下一回：009 澳門人講飲講食)編/攝：阿乃

都繼續留係大堂區講飲講食先，還未離開此區呀！ 007 澳門人講飲講食：金滿堂(高級西餅類) 今次我所介紹的是一間高級西餅店，它在澳門都有數載，初初店舖開設於澳門波鞋街(荷蘭園大馬路)，之後就開左係大堂斜巷呢度啦，之前仲係OK果個位，半年前才擴充營業，搬左過去隔隔離大的鋪位至今，提供各類西洋蛋糕及面包，而呢間店鋪就係"金滿堂"。 佢D西餅其實就同餅店差不多，但多了一些意大利芝士餅、意大利蛋糕等等，還有我的最愛Tiramisu，每杯6元或每件8元兩種，咖啡味濃又不覺膩，Rum酒味好香，唔會有飲酒那麼重口味，所以唔飲酒或不鍾意飲酒既都可以食(因為我都唔飲酒)。另外仲有拿破崙蛋糕、芝士餅及綠茶cake都係好好味。 在澳門來說它算係貴價西餅之列中最平既一間，當然平過高士德區的日本聖誕老人啦！如果你仲係留連緊九如坊呢D，本本旅遊書都標榜d食店，不如試下其他平平地又味道不俗的! 到達方法：可由南灣大馬路的"HSBC匯豐銀行"進入，或由大堂巷、板樟堂巷經耶穌十字廣場進入(下2圖)。(下一)：耶穌十字廣場(下二)：大堂斜巷(耶穌十字廣場教堂旁入口)   (下一期：008 澳門人講飲講食)編/攝：阿乃

各位，今天放工時，終於途經此區，我立即就拿出我的SX833充當相機，影返之前介紹比你地既食店d相，全部已經更新哂，你地可以去返之前D網誌度看看。 另外，有些地名需要改正，一直我說的大堂斜巷，其實真名叫"大堂巷"(所以網誌經已更正了)，大堂斜巷係另一條(見上面的手繪地圖)。 本來我想影埋002所介紹的第一檔魚蛋檔，可惜佢今天又休息，所以沒影到。但我就特意你看看佢叫乜名，原來叫"陳林記"，我食左咁耐都唔知佢叫乜名，真係攪笑。 上面的手繪地圖是我畫出來的，比較核突，但明確標明街名、位置以及方向，大家仔細留意一下啦！但006的金寶其實都係附近，應該係地圖的左邊大堂街箭頭行下去就見到啦！(因為我驚d字太細，所以唔敢畫得咁仔細，否則乜字都睇唔到！) 下圖是從土木實驗室影返過去廣場，看看，真係有十字架ga，我冇扼你地ga，唔係淨係得個名ga！ 編/攝：阿乃

006 澳門人講飲講食：金寶茶餐廳(澳葡茶餐廳)、金華美食(澳葡食店) 金寶茶餐廳，又係一間見證了澳門議事亭變遷的食店之一。以前的地址係噴水池M記對面的CTM及LEVI'S，因前幾年鋪租狂飆而結業，當時佢有4層樓ga，現在遷往白馬行葡文書局旁斜路，繼續營業，但店舖細了好多，但都有兩層。 金寶茶餐廳在以前係一間好普通的舊式茶餐室，門口有西餅蛋糕賣(現在新鋪都有)，當時佢隨著營業額，客人口味咁，不斷變化成為一間有澳葡菜的茶餐廳，一、二樓保留懷舊茶餐室方格，三、四樓設計高檔，成間高級餐廳咁ga，不過現在搬遷後，需保留西餅部分及繼續維持水準，但比以前的確少左d菜色。 新店的風格與大部分茶餐廳沒有兩樣，但菜色仍保有一定的澳葡菜色，價錢平味道不俗。兩層高但坐位不多，食飯時間往往爆滿，而店內牆上掛滿澳門舊時的歷史相片，問d伙計，佢地話係老闆的珍藏，有好多好有歷史性，亦比各遊客看看以前的澳門小城有多美，又讓我們澳門人回顧一下以前的澳門，不竟城市發展就免不多要犧牲一些東西，這是等價交換嘛！(blog主 鋼鍊上腦中......) 每逢我帶d香港朋友去食野，佢地都係咁問我果張相即係而家邊度呀？果時發生乜事呀？以前既議事亭原來係咁ga？......好多問題，反映原來大家都唔係淨係得個賭字來看澳門，佢地都好想了解下澳門既事，咁arm本人係讀旅遊系既，又有修澳門史，當然就為佢地解答左問題啦！有d朋友都覺得唔夠，我就帶佢地去買左一本"澳門街道的故事" 等佢地帶返香港。 言歸正傳，如果想吃澳葡餐，又唔想咁貴的話，佢都係唔錯的選擇，但就茶餐廳口味，大眾化一點囉。 --------------------------------------------------------------------------------------------金華美食，係金寶對面，以前叫大堂風行餐廳，以前係澳葡餐，之家基本上都唔係好多澳葡菜色，跟一般茶餐廳不大分別，但佢會有d特別的菜色，唔係間間都有得食，而且價錢平，份量多，味道好，所以食飯時間又係爆滿ga~~所以就介紹埋比大家囉！-------------------------------------------------------------------------------------------News：金寶茶餐廳現已搬遷，新鋪還未開張！(update at 2007-8-20) (下一回：007 澳門人講飲講食)編/攝：阿乃

005 澳門人講飲講食：大堂炸雞(快餐類) 麥當勞、大家樂、肯德基大家可能都幫襯唔少，但我們澳門其實係03年既時候開左一間屬於澳門道地土炮炸雞店，它的名字叫"大堂炸雞"，基本上係澳門人都會食過，佢地整既雞絕對好吃過澳門果隻肯德基，而且大堂炸雞的雞味道獨特，又係即叫即炸，非常新鮮，但此終係油炸食物，所以唔好多食。 店鋪係大堂街，可由郵政局旁樓梯(友邦中心對面)、仁慈堂旁斜路直上、主教座堂的十字耶穌廣場附近都可以到達，距離噴水池2分鐘步行，距離之前介紹的大堂巷食店約1-2分鐘腳程，佢門口有隻Q版大白雞做招牌ga！ 食物價格方面非常之便宜，差不多是肯德基一半左右。阿乃推介：1.炸雞脾(超大隻) 7蚊一隻，2隻又平d，3隻再平d，佢係實行買多d平多d。2.炸連皮薯角，又係好大碟，而且仲好好味，唔似有d店鋪炸到"林姐姐"，咬都咬唔開。3.薯茸，佢真係用薯仔整成糊狀，好香薯仔味，可以加沙律醬。唔似其他店舖咁用粉開，亦唔似肯德基果d"希冧冧"又冇薯味。4.如果多人一齊吃就買個 F餐(唔知有冇改名)，好抵吃，有3隻雞脾、3隻雞全翼、3杯汽水/涼茶、2枝粟米、一碗大薯茸，3、4個人絕對都夠吃，大食的2個人啦！ 另外佢D雞扒飽、意粉等就見人見志，有人話好有人話唔好食。但大家記住食佢既炸雞，一定要落淮鹽先至好吃，如果唔係唔夠野味呀！如果講漏左野或其他澳門朋友有補充的話，歡迎回覆呀！ -------------------------------------------------------------------------------------------------------(下一期都係繼續介紹議事亭附近的食店、小食館，各位可能要自己PLAN下應該要點食法先可以一次食哂又唔會飽到行唔郁啦！haha) (Update：2006/03/29)編/攝：阿乃